Իսպանական Cupra ապրանքանիշը որոշել է կտրուկ սահմանափակել թափքի վառ գույների օգտագործումը՝ պահպանելու համար իր սեփական վիզուալ ինքնությունը։ Autocar պարբերականի հարցազրույցում ապրանքանիշի դիզայներները բացեիբաց հայտարարել են, որ հագեցած կարմիր, դեղին և այլ «աղմկոտ» երանգները չեն համապատասխանում բրենդի փիլիսոփայությանը։ Ընկերության կրեատիվ տնօրեն Ֆրանչեսկա Սանգալին անգամ նշել է, որ նման գույները Cupra-ն «կթողնի Ferrari-ին»։
Ընկերության ներկայացուցիչների խոսքով՝ բրենդը ձգտում է ասոցացվել ոչ թե սուպերմեքենաների ավանդական սպորտային էսթետիկայի, այլ «ճարտարապետական» և զգացմունքային ավելի զուսպ դիզայնի հետ։ Վառ գունապնակի փոխարեն Cupra-ն խաղադրույք է կատարում անփայլ մակերեսների, զուսպ մոխրագույն և գրաֆիտային երանգների, ինչպես նաև բրենդային պղնձագույն շեշտադրումների վրա, որոնք արդեն դարձել են ապրանքանիշի առանցքային հատկանիշներից մեկը։
Այս մոտեցումը հատկապես նկատելի է վերջին կոնցեպտներում և ավտոմեքենաների հատուկ տարբերակներում։ Ընկերությունն ակտիվորեն փորձարկում է սրահի բարդ նյութերը և թափքի անսովոր ծածկույթները՝ փորձելով ստեղծել պրեմիում դիզայներական օբյեկտի, այլ ոչ թե պարզապես սպորտային մեքենայի տպավորություն։ Նոր մոդելներում ուշադրությունը վառ գույնից տեղափոխվում է ձևի, մանրամասների և ֆակտուրայի վրա։
Այս որոշումն անսովոր է թվում ավտոարդյունաբերության ֆոնին, որտեղ շատ արտադրողներ, ընդհակառակը, փորձում են վերադարձնել վառ գույները՝ սև, մոխրագույն և սպիտակ մեքենաների երկարատև գերիշխանությունից հետո։ Reddit-ի քննարկումներում երկրպագուների արձագանքը տարբեր է եղել. նրանց մի մասը զուսպ գամման համարում է Cupra-ի բրենդային առանձնահատկությունը, իսկ մյուսները դժգոհում են, որ մոդելային շարքը սկսում է չափազանց միօրինակ երևալ։ Հատկապես հաճախ օգտատերերը հիշատակում են հանրահայտ կարմիր երանգների անհետացումը։
Cupra-ն աստիճանաբար փորձում է հեռանալ նույնիսկ Volkswagen Group-ի «թեժ» սպորտային սուբբրենդի իր նախկին իմիջից։ Ընկերությունն ավելի ու ավելի ակտիվորեն է առաջ մղում իրեն որպես առանձին դիզայներական ապրանքանիշ՝ ժամանակակից նորաձևության, արդյունաբերական դիզայնի և ճարտարապետության ազդեցությամբ։ Եվ վառ գույներից հրաժարվելը, դատելով ըստ ամենայնի, դարձել է այս ռազմավարության մի մասը։