Կառավարության կառուցվածքը փոխելու իշխանությունների կատարած աշխատանքն իր ձեւով շատ նման էր նախկին իշխանությունների գործելաոճին, երբ երկու ամսից ավելի դրա մասին խոսվում է, բայց դա ինչ-որ գերգաղտնի պայմաններում է արվում եւ հրապարակային որեւէ քննարկում չկա: Այս մասին NEWS.am-ի հետ զրույցում նշեց քաղաքական տեխնոլոգ Արմեն Բադալյանը:
Նրա խոսքով, չկա որեւէ քննարկում, թե որ նախարարությունը կարելի է լուծարել, որ նախարարությունները կարելի է միացնել կամ չի կարելի միացնել:
«Չնայած իշխանության եկած ուժը հայտարարում էր, որ ինքը թափանցիկության կողմնակից է, բայց կոնկրետ այս ոլորտում մենք տեսնում ենք լրիվ հակառակ գործելաոճ»,-ասաց նա:
Ինչ վերաբերում է սուպերվարչապետական համակարգին, քաղտեխնոլոգը նշեց, որ դա ձեւել էր նախկին իշխանությունը, որպեսզի իր լիդեր Սերժ Սարգսյանը դառնա վարչապետ, ինչը լուրջ քննադատության էր արժանանում նաեւ այն ժամանակ ընդդիմադիր «Ելք» խմբակցության կողմից: «Մենք տեսնում ենք, որ իշխանափոխությունից հետո այդ ինստիտուտը մնացել է նույնը: Ավելին, կարող ենք ասել, որ այդ ինստիտուտը պահպանվելու է: Այստեղ կարող ենք փաստել, որ կուսակցապետ Նիկոլ Փաշինյանը հաղթեց վարչապետ Նիկոլ Փաշինյանին, որովհետեւ եթե դու սուպերվարչապետի ինստիտուտը վերացնում ես, դու դա անում ես հետագայի համար: Այսինքն դու հիմքն ես դնում երկրում ժողովրդավարության զարգացման համար, ինստիտուտների գործունեության հիմնք ես դնում: Բայց ցավոք, մենք տեսնում ենք, որ Փաշինյանի մեջ ավելի շատ կուսակցապետն է խոսում, քան պետական գործիչը: Մենք տեսնում ենք, որ Փաշինյանին սկսել է դուր գալ Սերժ Սարգսյանի համար ստեղծված ավտորիտար կառավարման համակարգը»,-ընդգծեց Արմեն Բադալյանը:
Նա կարծիք հայտնեց, որ կողմ է, որ ՊԵԿ-ն ու ոստիկանությունը դառնան նախարարություն եւ հաշվետու լինեն խորհրդարանին, իսկ ԱԱԾ-ն կարող է մնալ նույն կարգավիճակում. «Ոստիկանության եւ ՊԵԿ-ի հետ շփվում են հազարավոր մարդիկ տարբեր հարցերով: Այդ շփումների ժամանակ մարդիկ խնդիրներ են ունենում եւ դրանք լուծելու համար այդ կառույցները պետք է հաշվետու լինեն ԱԺ-ին եւ ընդդիմությունը կարողանա այդ խնդիրները բարձրաձայնել, հարցեր ուղղել: Հիմա այդ կառույցները հաշվետու են միայն իշխող ուժին: Բայց կարծես թե վարչապետը չի ցանկանում, որ դրանք դառնան հաշվետու ԱԺ-ին, միգուցե նաեւ այն պատճառով, որ դրանց հետ կապված խնդիրները չդառնան իր հասցեին քննադատության լրացուցիչ գործոն»,-ասաց Բադալյանը:
Ինչ վերաբերում է Նիկոլ Փաշինյանի հայտարարությանը, թե 7-8 ամսում երկրում բռնապետությո՞ւն է ստեղծվել, որ մտավախություն կա եւ ցանկություն, որ ոստիկանությունն ու ԱԱԾ-ն պետք է անպայման դառնան նախարարություն, քաղտեխնոլոգն ասաց. «Սա էլի նրա եսն է խոսում: Նա պետական համակարգի փոփոխության հիմքում դնում է իր անձի խնդիրը: Այսինքն եթե ինքը բռնապետություն չի ստեղծել, նշանակում է այդ հարցը չպետք է բարձրացնել: Իսկ պետական գործիչը հիմքում դնում է ոչ թե անձի, այլ ինստիտուտների գործոնը: Իսկ Նիկոլ Փաշինյանն ասում է՝ քանի որ ես բռնապետ չեմ, թող կառավարման համակարգը այսպես էլ մնա»:
Դիտարկմանը, թե վարչապետը հայտարարել է նաեւ, որ եթե այդ կառույցները դառնան նախարարություններ կքաղաքականացվեն, Արմեն Բադալյանն ասաց. «Շատ նորմալ է, որ նախարարը քաղաքական գործիչ է, քանի որ նրանք քաղաքականություն են իրականացնում: հարկային եւ մաքսային ոլորտում եւս քաղաքականություն է իրականացվում: ՊԵԿ նախագահը եւս պետք է քաղաքական թիմի մաս կազմի ու քաղաքականություն մշակի: Դրա համար էլ պետք է դառնա նախարարություն: Ընդ որում, բնավ պարտադիր չէ, որ նախարարը լինի կուսակցական, բայց նա քաղաքական թիմի անդամ է: Ի դեպ, նախարարությունը չի քաղաքականացվում, պարզապես նախարարն է քաղաքական պաշտոնյա»:
0Comments