Ընկերությունների ներսում սոցիալական ցանցերի օգտագործումը կարող է բարձրացնել աշխատակիցների ներգրավվածությունը և օգնել կազմակերպություններին պահպանել անձնակազմը, ցույց է տվել Չինաստանի գիտնականների հետազոտությունը։ Աշխատանքի արդյունքները հրապարակվել են International Journal of Applied Systemic Studies-ում։
Հետազոտողները ուսումնասիրել են, թե ինչպես է հաղորդակցության համար թվային հարթակների օգտագործումը ազդում աշխատակիցների աշխատանքի նկատմամբ վերաբերմունքի և ընկերությունից նրանց հեռանալու հավանականության վրա։ Վերլուծության համար նրանք կիրառել են կառուցվածքային մոդելավորման մեթոդ, որը թույլ է տալիս միաժամանակ գնահատել մի քանի գործոնների միջև փոխկապակցվածությունները։
Պարզվել է, որ միայն կորպորատիվ սոցցանցերի առկայությունը դեռևս չի երաշխավորում դրական ազդեցություն։ Հատկապես կարևոր են եղել երկու գործոն՝ որքանով են աշխատակիցները նման գործիքները համարում հարմար և որքանով են դրանք օգտակար առօրյա աշխատանքում։ Որքան ավելի պարզ և գործնական էին թվային հարթակները, այնքան ավելի ուժեղ էին դրանք նպաստում աշխատակիցների ներգրավվածությանը և կազմակերպությունում մնալու նրանց ցանկությանը։
Գիտնականների կարծիքով՝ սոցիալական ցանցերը կարող են բարելավել աշխատանքային հաղորդակցությունը, հեշտացնել գիտելիքների փոխանակումը և աշխատակիցներին հնարավորություն տալ ստանալ ճանաչում իրենց ձեռքբերումների համար։ Դրա շնորհիվ աշխատակիցների մոտ ձևավորվում է ավելի սերտ կապ գործընկերների, ղեկավարների և հենց կազմակերպության հետ։
Նման ներգրավվածությունը կարող է անմիջականորեն անդրադառնալ կադրերի հոսունության վրա։ Եթե աշխատակիցները իրենց զգում են կոլեկտիվի մի մաս և կապ են պահպանում կազմակերպության հետ, նրանց աշխատանքից հեռանալու հավանականությունը նվազում է։ Գործատուների համար սա նշանակում է փորձառու մասնագետների պահպանում և նոր աշխատակիցների որոնման, աշխատանքի ընդունման ու վերապատրաստման ծախսերի կրճատում։
Հետազոտությունը հատկապես արդիական է Չինաստանի համար, որտեղ սոցիալական հարթակները նկատելի դեր են խաղում աշխատանքային հաղորդակցություններում։ Միևնույն ժամանակ հեղինակները կարծում են, որ իրենց եզրակացությունները կարող են օգտակար լինել նաև այլ կազմակերպությունների համար, որոնք ներդնում են թվային հաղորդակցության գործիքներ։
Գիտնականների գլխավոր եզրակացությունն այն է, որ միայն կորպորատիվ սոցցանցերի ներդրումը բավարար չէ։ Որպեսզի դրանք իսկապես օգնեն պահպանել աշխատակիցներին, հարթակները պետք է լինեն հասկանալի, հարմար և աշխատանքի մեջ բերեն շոշափելի օգուտ։