ԱՄՆ նախագահ Դոնալդ Թրամփը հայտարարել է, թե Իրանը «լիակատար փլուզման» մեջ է։ Սա տեղի է ունենում այն ֆոնին, երբ Վաշինգտոնը պատրաստվում է տնտեսական նոր խիստ քայլեր ձեռնարկել՝ Թեհրանի վրա ճնշումն ուժեղացնելու համար։
Truth Social սոցիալական ցանցում արած հրապարակման մեջ Թրամփը գրել է․ «Իրանը լրիվ քանդվում է»։ Այս հայտարարությունն արվել է ԱՄՆ ֆինանսների նախարար Սքոթ Բեսենթի պլանավորված ասուլիսից առաջ, որտեղ ներկայացվելու է իրանական ռեժիմը տնտեսապես կործանելու ծրագիրը։
Financial Times-ում հրապարակված իր հոդվածում Բեսենթն ավելի վաղ հայտարարել էր Իրանի համար սպասվող «տնտեսական դատաստանի օրվա» մասին․ նա խոստացել էր կտրել ռեժիմի ֆինանսավորման բոլոր աղբյուրներն ու երկրորդային պատժամիջոցներով սպառնացել Թեհրանի հետ համագործակցող երկրներին։
Այս հայտարարությունների և խորացող դիմակայության պատճառով իրանական արժույթը ազատ շուկայում պատմական անկում է գրանցել․ ըստ ֆինանսական հարթակների՝ մեկ դոլարի գինը հատել է 2 միլիոն ռիալի շեմը։