Մելանյան և Դոնալդ Թրամփն ավելի քան մեկ ամսվա ընթացքում առաջին անգամ միասին հայտնվել են հանրության առջև։ ԱՄՆ առաջին տիկինը միացել է նախագահին Սպիտակ տան Վարդերի այգում անցկացված միջոցառմանը, որը նվիրված էր նրա Fostering the Future նախաձեռնությանը՝ ուղղված որդեգրող ընտանիքների համակարգից դուրս եկող երիտասարդներին աջակցելուն։
Լրագրողներին ժպտալով՝ Մելանյան իր ելույթն սկսել է կարճ արտահայտությամբ. «Լսել եմ՝ կարոտել եք ինձ։ Ահա ես»։
Ամուսինների համատեղ հայտնվելը տեղի է ունեցել 35-ամյա Նաթալի Հարփի՝ Դոնալդ Թրամփի գործադիր օգնականի նկատմամբ աճող ուշադրության ֆոնին, որը վերջին շրջանում գրեթե մշտապես գտնվում է նախագահի կողքին։ Քննարկումների նոր ալիքի պատճառ են դարձել դեմոկրատ սենատոր Ջոն Օսոֆի հայտարարությունները, որն անցյալ շաբաթ ասել էր, թե Թրամփը նախընտրում է «կառուցել իր պարահանդեսային դահլիճը և ճանապարհորդել Նաթալիի հետ», այլ ոչ թե զբաղվել նախագահի պարտականություններով։
Մելանյան և Դոնալդ Թրամփը միասին հանրության առջև չէին հայտնվել հուլիսի 19-ին Նյու Ջերսիում ֆուտբոլի աշխարհի առաջնության եզրափակչից ի վեր։ Այս ֆոնին առաջին տիկնոջ հազվադեպ հայտնվելը և նախագահի կողքին Հարփի մշտական ներկայությունը դարձել են բազմաթիվ հրապարակումների թեմա։
2026 թվականին Մելանյային հանրության առջև տեսել են ընդամենը 38 անգամ, մինչդեռ նրա ամուսնու առաջին նախագահական ժամկետի առաջին 18 ամիսների ընթացքում նա հանրությանը ներկայացել էր մոտ 140 անգամ։
Միևնույն ժամանակ, Հարփը պարբերաբար ուղեկցում է Թրամփին ուղևորությունների ժամանակ, հայտնվում է Air Force One-ում, նրա կողքին է Օվալաձև աշխատասենյակում և մասնակցում է նրան պատկանող ակումբներում անցկացվող միջոցառումներին։
Լրատվամիջոցների հաղորդմամբ՝ Մելանյան, իբր, դժգոհ է օգնականի նկատմամբ աճող ուշադրությունից։ Սպիտակ տանը մոտ կանգնած աղբյուրը Semafor պարբերականին ասել է. «Առաջին տիկնոջը նման բաները դուր չեն գալիս»։
Ինքը՝ Հարփը, նախկինում աշխատել է որպես հեռուստահաղորդավարուհի One America News-ում և հայտնի է դարձել Թրամփին նվիրվածությամբ։ Ինչպես պնդվում է, նա նախագահին անձնական գրություններ է գրում, ինչպես նաև նրա համար տպում է հոդվածներ և հրապարակումներ սոցցանցերում , որոնք դրական արձագանք են գտնում նրա գործունեության մասին։ Այս սովորության համար օգնականին տվել են «մարդ-տպիչ» մականունը։
Այս լուրերի ֆոնին Մելանյան և Դոնալդ Թրամփը միասնականություն են ցուցադրել։ Նրանք միասին մտել են Վարդերի այգի, ձեռք ձեռքի բռնած, և միջոցառման ընթացքում նստել են կողք կողքի։
Իր նախաձեռնության շրջանակում առաջին տիկինը հայտարարել է IndyCar-ի և Fox Sports-ի հետ գործընկերության մասին, որը թույլ կտա ընդլայնել որդեգրման համակարգից դուրս եկող երիտասարդների համար կրթաթոշակային ծրագիրը։ Ֆինանսավորում կստանան Ինդիանայի և Փերդյու համալսարանների ծրագրերը։
«Fostering the Future-ի շրջանավարտները կստեղծեն նոր ընկերություններ, կգործարկեն նոր ճյուղեր և կսահմանեն հնարավորի նոր սահմաններ բոլոր ամերիկացիների համար», — հայտարարել է Մելանյան։
Միջոցառման ժամանակ առաջին տիկնոջը նաև նվիրել են իր անունով մրցարշավային սաղավարտ, որը պետք է օգտագործվի առաջիկա մրցավազքի ընթացքում։ Նրա կողքին դրել էին IndyCar-ի մեքենա՝ նրա Be Best արշավի խորհրդանիշներով։