Հուլիսի 31-ի գիշերը ուկրաինական անօդաչու թռչող սարքերը զանգվածային հարձակում են գործել Վոլգոգրադի մարզի վրա: Այս մասին հայտնել է մարզպետ Անդրեյ Բոչարովը։ «Գիշերվա ընթացքում ԱԹՍ-ների հարվածների հետևանքով հրդեհներ են բռնկվել Վոլգոգրադի հարավում գտնվող վառելիքաէներգետիկ համալիրի արդյունաբերական ձեռնարկությունում, ինչպես նաև Դզերժինսկի շրջանի պահեստային տարածքներում», — նշել է նահանգապետը։ Բացի այդ, վնասվել են Վոլգոգրադի բազմաբնակարան շենքերից մեկը և Կրասնոարմեյսկի շրջանում գտնվող առանձնատունը։ Հինգ մարդ հոսպիտալացվել է։
Wildberries-ից հայտնել են, որ հարվածի տակ է հայտնվել ընկերության լոգիստիկ կենտրոնը։ «Հրդեհ է բռնկվել: Դեպքի վայրում աշխատում են հրշեջ ջոկատները։ Նախնական տվյալներով՝ տուժածներ չկան», — հայտնել են մարքեթփլեյսի մամուլի ծառայությունից։ Ինչպես գրում է Astra-ն, հարձակման ենթարկված երկրորդ օբյեկտը եղել է «Լուկօյլ-Վոլգոգրադնեֆտեպերերաբոտկա» նավթամշակման գործարանը (ՆՄԳ): Գործարանը տարեկան կարող է վերամշակել 14,8 միլիոն տոննա նավթ։ Ավելի վաղ՝ մայիսի վերջին, անօդաչուները կրկին հարվածել էին այս ձեռնարկությանը, ինչից հետո այն ժամանակավորապես դադարեցրել էր աշխատանքը։
Բացի այդ, անցած գիշեր ուկրաինական անօդաչու սարքերը հարձակվել են նաև Թաթարստանի վրա։ Զելենոդոլսկում տեղի բնակիչները պայթյունների ձայներ են լսել։ Ուկրաինական Exilenova+ մոնիտորինգային ալիքի տվյալներով՝ հարվածն ուղղված է եղել Wildberries-ի լոգիստիկ համալիրին։ Առավոտյան ծուխ է նկատվել օբյեկտի երկնքում։ Անօդաչուներն այս պահեստի վրա հարձակվել էին նաև հուլիսի 23-ին, սակայն լուրջ վնաս չէին հասցրել։ Բացի այդ, Նիժնեկամսկում ավելի քան 30 պայթյուն է որոտացել. քաղաքի բնակիչները հայտնել են Նիժնեկամսկի նավթամշակման գործարանի տարածքում բռնկված հսկայական կրակի մասին:
Նախօրեին՝ հուլիսի 30-ին, ուկրաինական անօդաչուները հարձակվել են Պենզայի մարզում, Ուդմուրտիայում և Պերմի երկրամասում գտնվող Wildberries-ի երեք պահեստների վրա: Բոլոր օբյեկտներում հրդեհներ են բռնկվել, իսկ Պենզայի մոտ գտնվող լոգիստիկ կենտրոնի աշխատակիցներից մեկը տուժել է։ Ուկրաինայի զինված ուծերը հուլիսի 18-ից սկսել են հարվածել ռուսական խոշորագույն մարքեթփլեյսի պահեստներին և վերջին երկու շաբաթվա ընթացքում հարձակվել են առնվազն 18 բաշխիչ կենտրոնների վրա: Արդյունքում շարքից դուրս է եկել ընկերության պահեստային հզորությունների ավելի քան 15%-ը:
Ռուսական նավթամշակման գործարանների (ՆՄԳ) ուղղությամբ ուկրաինական հարվածների արշավը շարունակվում է դեռևս անցյալ տարվա օգոստոսից։ Հուլիսի 29-ին անօդաչուները հարվածել են Պերմում գտնվող «Լուկօյլի» ՆՎԳ-ին, ինչից հետո, ըստ Reuters-ի աղբյուրների, գործարանը դադարեցրել է իր հզորությունների մոտավորապես մեկ երրորդի աշխատանքը։ Այդ նույն օրը հարձակման է ենթարկվել նաև «Ռոսնեֆտի»՝ Ռյազանի ՆՎԳ-ն, որը ևս առժամանակ դադարեցրել է նավթի վերամշակումը։ Financial Times-ի տվյալներով՝ մինչև հուլիսի վերջը շարքից դուրս եկած 26 նավթամշակման գործարաններից Ռուսաստանին հաջողվել է լիարժեք աշխատանքի վերադարձնել միայն 8-ին։