Կենտրոնական Չիլիում Սերո Պաչոն լեռան գագաթին գտնվող Վերա Ս. Ռուբինի անվան աստղադիտակի միջոցով գիտնականները հայտնաբերել են սառցե մի մարմին, որը պտտվում է Պլուտոնից այն կողմ և, հնարավոր է, համալրի մեր արեգակնային համակարգի գաճաճ մոլորակների շարքը։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Աստղադիտակն ԱՄՆ Գիտության ազգային հիմնադրամի և ԱՄՆ էներգետիկայի գերատեսչության համատեղ նախաձեռնությունն է։
Գիտնականների խոսքով՝ 2026 ED138 անվանումը ստացած այս մարմնի տրամագիծն, ըստ գնահատականների, տատանվում է մոտավորապես 600–1500 կմ-ի սահմաններում, իսկ Արեգակից այն գտնվում է մոտ 46 անգամ ավելի հեռու, քան Երկիրը։
Գիտնականները պլանավորում են մի շարք դիտարկումներ անցկացնել՝ մարմնի՝ որպես նոր գաճաճ մոլորակի կարգավիճակը հաստատելու համար։ Կարգավիճակի հաստատման դեպքում 2026 ED138-ը կլինի հայտնի ամենամեծ գաճաճ մոլորակներից մեկը։Մասնավորապես, աստղաֆիզիկոսները պետք է որոշեն մարմնի մոտավոր զանգվածը։
Ներկայում գիտնականները կարծում են, որ 2026 ED138-ը, հավանաբար, բավարար զանգված ունի որպես գաճաճ մոլորակ դասակարգվելու համար։
Միջազգային աստղագիտական միությունն այժմ ճանաչում է հինգ գաճաճ մոլորակների գոյությունը՝ Պլուտոն, Ցերերա, Էրիդա, Հաումեա և Մակեմակե։