Ուկրաինացի զինվորականների կողմից մարտի դաշտում կապի և անօդաչուների կառավարման համար օգտագործվող Starshield արբանյակային համակարգի աշխատանքի սահմանափակման մասին հրահանգը տրվել է անմիջապես Սպիտակ տնից։ Այդ մասին Reuters-ին հայտնել են երկու ամերիկացի պաշտոնյա և որոշման ընդունման հանգամանքներին ծանոթ արևմտյան ներկայացուցիչը։
Զրուցակիցների խոսքով՝ ԱՄՆ պաշտպանության նախարարության ղեկավարությանը փոխանցվել է ցուցում՝ նվազեցնել SpaceX ընկերության Starshield ծառայության արագությունը, որն օգտագործվում է ուկրաինացի զինվորականների կողմից։
Միևնույն ժամանակ աղբյուրները չեն հստակեցրել, թե Սպիտակ տանն ով է հենց ընդունել այդ որոշումը և ում է հանձնարարվել ապահովել դրա կատարումը։ Պենտագոնը Starshield-ի՝ Starlink արբանյակային ծառայության ռազմական տարբերակի, ամենախոշոր պատվիրատուն է։
Այս շաբաթ ուկրաինացի պաշտոնյաները հայտարարել էին, որ Starlink ռազմական տերմինալները դադարել են ճիշտ աշխատել Ուկրաինայի տարածքում, երբ տեղադրվում են արագ շարժվող օբյեկտների վրա։ Դա խաթարել է ուկրաինական անօդաչուների աշխատանքը, որոնք արբանյակային կապն օգտագործում են ուղղորդման բորտային համակարգերի աշխատանքի համար։
Հինգշաբթի Ուկրաինայի պաշտպանության նախարարության ներկայացուցիչը հայտնել է, որ տերմինալները կրկին աշխատում են շարժման ընթացքում, սակայն միայն մոտ 160 կմ/ժ արագության դեպքում։
Կենսական կարևորություն ունեցող կապի համակարգի աշխատանքի ժամանակավոր սահմանափակման որոշումն ընդունվել է ԱՄՆ նախագահ Դոնալդ Թրամփի կողմից գործադրվող ճնշման ֆոնին, որը Կիևից պահանջում է դադարեցնել հարձակումները ռուսական նավթավերամշակման գործարանների վրա։ Թրամփը հենց այդ հարվածների վրա է դնում էներգակիրների գների կտրուկ աճի պատասխանատվությունը, ինչը բացասաբար է ազդում Հանրապետական կուսակցության հեռանկարների վրա ԱՄՆ Կոնգրեսի միջանկյալ ընտրություններում, որոնք նախատեսված են նոյեմբերին։
Միաժամանակ փորձագետները նշում են, որ էներգակիրների գների աճի հիմնական պատճառը ԱՄՆ-ի և Իսրայելի պատերազմն է Իրանի դեմ։ Դա հանգեցրել է Իրանի հարձակումներին էներգետիկ ենթակառուցվածքների վրա և ռազմավարական կարևորություն ունեցող Հորմուզի նեղուցով նավարկության փաստացի դադարեցմանը։
Մեկնաբանելով Starshield-ի աշխատանքի սահմանափակման վերաբերյալ հրահանգի մասին հաղորդումները՝ ամերիկյան վարչակազմի բարձրաստիճան ներկայացուցիչը հայտարարել է. «Նախագահը երբեք նման հրահանգ չի տվել»։
SpaceX-ը Starshield-ը մշակել է հատուկ պետական կառույցների և ազգային անվտանգության հարցերով զբաղվող կազմակերպությունների համար՝ առաջին հերթին ԱՄՆ պաշտպանության նախարարության համար։ Համակարգն իր ենթակառուցվածքի հիմքում օգտագործում է Starlink արբանյակային համաստեղությունը։