Երկու անվտանգության աշխատակից զոհվել են Եմենի հարավում գտնվող նավահանգստային Ադեն քաղաքում ալ-Մաաշիք նախագահական պալատի վրա հութիների հրթիռային հարվածի հետևանքով։ Այդ քաղաքում տեղակայված է երկրի միջազգայնորեն ճանաչված կառավարության նստավայրը։
Ըստ Եմենի տեղեկատվության նախարար Մուամմար ալ-Էրյանիի՝ պալատի ուղղությամբ արձակվել է հինգ բալիստիկ հրթիռ։ Վարչապետը և կառավարության մյուս անդամները չեն տուժել, սակայն հարձակման հետևանքով շատ մարդիկ վիրավորվել են, BBC News-ին հայտնել է նախարարը։
Հութիները հայտարարել են, որ հարվածի թիրախում եղել են ռազմական գործողությունների շտաբը, որը ղեկավարում են սաուդցի սպաները, ինչպես նաև զենքի պահեստները։
Եմենի կառավարությանն աջակցում է Սաուդյան Արաբիայի գլխավորած կոալիցիան, որը օդային աջակցություն է ցուցաբերում հութիների դեմ կառավարամետ ուժերի հարձակմանը։ Իրանի աջակցությունը վայելող խմբավորումը վերահսկում է Արևմտյան Եմենի զգալի մասը, ներառյալ մայրաքաղաք Սանան։
Իրենց վերահսկողության տակ գտնվող տարածքների վրա հարվածներին ի պատասխան՝ հութիները բազմիցս հրթիռներ և անօդաչու սարքեր են արձակել դեպի Սաուդյան Արաբիա։ Հարձակումների թիրախների թվում եղել են օդանավակայաններ, նավթագազային օբյեկտներ և ռազմական բազաներ։
Շաբաթ օրը հութիների հրթիռային հարվածը Էր-Ռիադի միջազգային օդանավակայանին խլել է 13 մարդու կյանք։ BBC-ի տվյալներով՝ դա Սաուդյան Արաբիայի տարածքում ավելի քան տասը տարվա ընթացքում ամենամահաբեր հարձակումն էր։