Սոչիի ափերի մոտ անօդաչուների հարձակման ենթարկված նավթատար լցանավի վրա խոշոր հրդեհից հետո հարևանությամբ գտնվող «Սիրիուս» դաշնային տարածքի իշխանությունները «քաղաքացիների անվտանգության ապահովման նպատակով» փակել են բոլոր լողափերը։ Այս մասին հայտնել է բնակավայրի ղեկավար Դմիտրի Պլիշկինը, ով հաստատել է հրդեհի փաստը։
«Ռոսհիդրոմետի հետ համատեղ իրականացվում է ջրի և օդի վիճակի մշտական մոնիթորինգ։ Խնդրում եմ դաշնային տարածքի բնակիչներին և հյուրերին ձեռնպահ մնալ փողոցներում երկար գտնվելուց և, հնարավորության դեպքում, չբացել շենքերի պատուհանները», — տելեգրամ-ալիքում գրել է պաշտոնյան՝ խոստանալով զեկուցել մոնիթորինգի արդյունքների մասին։
«Ֆոնտանկայի» տեղեկություններով՝ Սոչիի ծովային նավահանգիստ է ժամանել ԱԻՆ-ի մեքենա, իսկ լողափերի մուտքերը փակվել են ազդանշանային ժապավեններով, մուտքն այժմ փակ է։ Ինչպես հաղորդվում է, նավահանգստի շրջանում այրվածքի հոտ է զգացվում, սակայն զբոսավայրերում կյանքը շարունակվում է իր բնականոն հունով։ Տեղի բնակիչները հայտնում են, որ Սոչիում «նույնիսկ մեքենայի մեջ էր գարշահոտ գալիս»․ «Եթե սա նավթ է, շատ վատ է, ավելի լավ է փակեք պատուհանները և սա մի շնչեք։ Այս հոտը ամենուր է, դրանից կարող է շատ ուժեղ գլխացավ առաջանալ»։ Քաղաքը սև ծխով պատած հրդեհը սկսվել է երեկոյան մոտ ժամը վեցին։ Նախնական տվյալներով՝ հրդեհվել է Aframax Rio տանկերը, որի վրա, բաց տվյալների համաձայն, կարող է գտնվել 95 000 — 100 000 տոննա նավթ։
Ավելի վաղ Mash-ը պնդում էր, որ նավը, որը Նովոռոսիյսկից դեպի Հնդկաստան էր ընթանում Լիբերիայի դրոշի ներքո, «գրեթե մինչև վերջ բեռնված էր»։ Սկզբում տեղական հանրային էջերը հայտնում էին, որ տանկերը գտնվում էր չեզոք ջրերում, սակայն, ըստ արբանյակային լուսանկարների, որոնք մեջբերում է ուկրաինական «Կրիմսկի վետեր» ալիքը, նավը դրեյֆում է ՌԴ տարածքային ջրերում՝ Սոչիի ափից 11 կմ հեռավորության վրա։
Նավթով բեռնված Aframax Rio-ն ենթարկվել է անձնակազմ չունեցող կատերների (ԲԷԿ) հարձակման, հայտարարել է ՌԴ տրանսպորտի նախարարության ղեկավար Անդրեյ Նիկիտինը։ Նրա տվյալներով՝ հաջողվել է փրկել անձնակազմին, որը բաղկացած էր Հնդկաստանի 23 քաղաքացիներից։ «Ներկայումս Սև ծովի ջրատարածքում տեղի է ունենում նավթի բաց այրում։ Մարման աշխատանքներին հնարավոր կլինի անցնել դրա ինտենսիվության նվազումից հետո, երբ հնարավոր կդառնա փրկարար նավերի անվտանգ մոտենալը տանկերին», — հայտնել են գերատեսչությունից։
Բաց տվյալներից հետևում է, որ 2024–2026 թվականներին տանկերը կանոնավոր կերպով նավթ էր տեղափոխում ռուսական նավահանգիստներից՝ Ուստ-Լուգայից, Նովոռոսիյսկից և Տամանից, դեպի Հնդկաստան, Սինգապուր և Սաուդյան Արաբիա։