Կատարի միջնորդությամբ այս շաբաթ անցկացված ԱՄՆ-Իրան բանակցություններում էական առաջընթաց չի գրանցվել։ Կողմերը շարունակում են մնալ միմյանցից էականորեն տարբեր դիրքորոշումների վրա, հայտնում է Axios-ը՝ բանակցություններին ծանոթ երեք աղբյուրների վկայակոչմամբ։
Կատարի միջնորդ Ալի ալ-Թավադին երկուշաբթի Նյու Յորքում հանդիպել է Իրանի արտգործնախարար Աբբաս Արաղչիի և նրա թիմի հետ։ Քննարկվել է Կատարի ներկայացրած երկէջանոց փոխզիջումային առաջարկը, որը նախատեսում էր միաժամանակ անդրադառնալ Իրանի՝ ԱՄՆ ծովային շրջափակումը վերացնելու պահանջին և Վաշինգտոնի՝ Իրանի միջուկային ծրագրի սահմանափակումների վերաբերյալ պահանջներին։
Նույն օրը Կատարի միջնորդը Վաշինգտոնում հանդիպել է ԱՄՆ նախագահի հատուկ բանագնաց Ջարեդ Քուշների և ամերիկացի այլ պաշտոնյաների հետ։ Հանդիպման մի հատվածին մասնակցել է նաև փոխնախագահ Ջեյ Դի Վենսը։
Axios-ի աղբյուրներից մեկի խոսքով՝ բանակցություններում էական տեղաշարժ չի եղել։ Իրանական կողմը, ըստ աղբյուրների, պատրաստ է քննարկել միջուկային զիջումները միայն այն դեպքում, եթե ԱՄՆ-ը համաձայնի վերադառնալ հունիսին ձեռք բերված փոխըմբռնման հուշագրին։
Միևնույն ժամանակ, Իրանի Ազգային անվտանգության գերագույն խորհրդի քարտուղար Մոհսեն Ռեզային հայտարարել է, որ Թեհրանը Վաշինգտոնին փոխանցել է իր պայմանները։ Նրա խոսքով՝ ԱՄՆ նախագահ Դոնալդ Թրամփը «չի կարող որոշում կայացնել»։
Թրամփն իր հերթին լրագրողներին հայտարարել է, որ ԱՄՆ-ը փորձում է թույլ չտալ Իրանին միջուկային զենք ձեռք բերել և պնդել է, որ Թեհրանը, ի վերջո, կհրաժարվի դրանից։
Բանակցությունների շուրջ ստեղծված փակուղին մեծացնում է ռազմական գործողությունների վերսկսման մտավախությունները։ Axios-ի աղբյուրների համաձայն՝ ամերիկացի պաշտոնյաները քննարկում են նաև ընտրություններից հետո ռազմական գործողությունների լայնածավալ վերսկսման հնարավորությունը։