Սինգապուրում խստացրել են հասարակական տրանսպորտում վարքի կանոնները․ ուղևորներին կարող են տուգանել բարձր աղմուկի, աղբ թափելու, ուտելիքի և խմիչքի, ինչպես նաև նստարանների վրա ոտքերը դնելու համար։ Տուգանքի չափը՝ կախված խախտումից, կարող է հասնել 5000 սինգապուրյան դոլարի՝ մոտ 3900 ԱՄՆ դոլար, գրում է Jalopnik-ը։
Նոր միջոցները դարձան այն կանոնների շարունակությունը, որոնք իշխանությունները վերջին տարիներին սկսել էին աստիճանաբար ներդնել հասարակական տրանսպորտում։ 2024 թվականի դեկտեմբերին ավտոբուսներում հայտնվել էին հայտարարություններ՝ ուղևորներին խնդրելով չաղմկել, զբաղեցնել միայն մեկ տեղ և չնստել հատակին։
Անցած տարվա հոկտեմբերին Սինգապուրի խորհրդարանը ընդունեց փոփոխություններ, որոնք լիազորված տրանսպորտային ընկերությունների աշխատակիցներին թույլ տվեցին ինքնուրույն արձանագրել խախտումները և տեղեկությունը փոխանցել Ցամաքային տրանսպորտի վարչություն։ Միաժամանակ վարորդները կարող են խախտողին հեռացնել ավտոբուսից կամ կանչել ոստիկանություն։
Մինչև 500 սինգապուրյան դոլարի տուգանք (մոտ 390 ԱՄՆ դոլար) նախատեսված է այնպիսի խախտումների համար, ինչպիսիք են երաժշտության կամ հեռախոսի ձայնի բարձր միացումը, աղբ թափելը, ուտելիքն ու խմիչքը, ինչպես նաև նստարանի վրա ոտքերը դնելը։ Տրանսպորտային ծառայությունների գույքը վնասելու կամ այլ ուղևորների համար վտանգ ստեղծող գործողությունների համար տուգանքը կարող է հասնել 5000 դոլարի։
Սինգապուրի իշխանություններն ակնկալում են, որ հստակ կանոնների և ֆինանսական պատժամիջոցների համադրությունը կօգնի հասարակական տրանսպորտով երթևեկությունն ավելի հարմարավետ դարձնել բոլոր ուղևորների համար։ Միևնույն ժամանակ, նոր տուգանքների արդյունավետությունը դեռ պետք է գնահատվի։
Սակայն Սինգապուրը միակ վայրը չէ, որտեղ իշխանությունները փորձում են պայքարել հասարակական տրանսպորտում աղմուկի դեմ։ Առանց ականջակալների բարձր երաժշտություն միացնելու սահմանափակումներ գործում են, մասնավորապես, Պեկինում, Կրակովում և Տորոնտոյում։ Ֆրանսիական Նանտում մի տղամարդ մոտ 200 ԱՄՆ դոլարի տուգանք է վճարել հեռախոսի բարձրախոսով խոսելու և կայարանում զրույցը դադարեցնելուց հրաժարվելու համար։
Լոնդոնում իշխանությունները նույնպես արշավ էին անցկացրել այն ուղևորների դեմ, որոնք առանց ականջակալների երաժշտություն են լսում կամ տեսանյութեր դիտում։ Խախտողներին կարող էին տուգանել մինչև 1000 բրիտանական ֆունտ ստեռլինգով և պահանջել լքել գնացքը։