Գերմանիայի գործերի ժամանակավոր հավատարմատարին տեղեկացվել է, որ Ռուսաստանը վճռականորեն մերժում է Բեռլինի՝ Լայպցիգում տեղի ունեցած միջադեպի վերաբերյալ լիովին անհիմն մեղադրանքները, հաղորդում է Ռուսաստանի արտաքին գործերի նախարարությունը։
«Գերմանիայի հակառուսական գործողությունները կստանան կոշտ պատասխան։ Բեռլինը միտումնավոր սադրանք է սկսել՝ ուղղված երկկողմ հարաբերությունների սրմանը:
Բոննում Ռուսաստանի գլխավոր հյուպատոսությունը և Բեռլինում Ռուսաստանի տունը փակելու որոշումը քայլ էր դեպի Ռուսաստանի և Գերմանիայի միջև հարաբերությունների վերջնական խզումը»,-նշված է ՌԴ ԱԳՆ տարածած հայտարարության մեջ։
Նախարարությունը հայտնում է, որ Մոսկվայում Գերմանիայի գործերի ժամանակավոր հավատարմատարը կանչվել է Ռուսաստանի արտաքին գործերի նախարարություն՝ գերմանական իշխանությունների կողմից հակառուսական գործողությունների և հայտարարությունների ֆոնին։
Ավելի վաղ Գերմանիայի իշխանությունները Լայպցիգի օդանավակայանում անօդաչու թռչող սարքի միջադեպի երկու կասկածյալ են բացահայտել, հաղորդում է «Süddeutsche Zeitung» թերթը՝ հղում անելով աղբյուրներին։
Կասկածյալները, ենթադրաբար, Ռուսաստանից ծագումով Լատվիայի քաղաքացի են և ռուսական անձնագիր ունեցող Բելառուսի բնակիչ։ Երեքշաբթի օրը Գերմանիայի կառավարությունը պաշտոնապես մեղադրել է Ռուսաստանին Լայպցիգ/Հալլե օդանավակայանում անօդաչու թռչող սարքի միջադեպի համար և հայտարարել է հակազդեցությունների մասին։