Եվրոպայում երաշտն ու անտառային հրդեհները սկսել են բացահայտել ևս մեկ վտանգ՝ Առաջին և Երկրորդ համաշխարհային պատերազմների ժամանակներից մնացած չպայթած ռազմամթերքը, հայտնում է Euronews-ը։
Հրդեհներն արդեն հանգեցրել են պայթյունների Ֆրանսիայում, Գերմանիայում, Բելգիայում և Նիդեռլանդներում։
Ֆրանսիայի հարավարևմուտքում՝ Բորդոյի շրջանում, հրդեհի հետևանքով հայտնաբերվել է ենթադրաբար Երկրորդ համաշխարհային պատերազմի ժամանակների գերմանական ռազմամթերքի խոշոր պահեստ։ Բելգիայի Լիեժ նահանգում, որտեղ հատկապես ուժեղ այրվում է Հայ Ֆենս շրջանը, փրկարար ծառայություններն այժմ հաշվի են առնում հողի մեջ ռազմամթերքի առկայության հնարավորությունը։ Նահանգապետ Էրվե Ժամարը հայտնել է մի քանի մեկուսացված պայթյունների մասին։
Հայ Ֆենսը գտնվում է Բելգիայի և Գերմանիայի սահմանին և եղել է Արդենների ճակատամարտի շրջաններից մեկը՝ Արևմտյան ճակատում գերմանական խոշոր հարձակումը, որը սկսվել է 1944 թվականի դեկտեմբերի 16-ին։
Երաշտը հանգեցնում է ոչ միայն հին ռազմամթերքի հայտնաբերմանը։ Եվրոպական գետերի ջրի մակարդակի իջեցման պատճառով մակերես են դուրս եկել ռազմական մասունքներ՝ գերմանական ռազմական նավեր, վերմախտի մոտոցիկլ և Երկրորդ համաշխարհային պատերազմի ժամանակների ռումբեր։
Արիզոնայի համալսարանի հետազոտող Քրիստինա Գրինը նշել է, որ կլիմայի փոփոխությունը բառացիորեն կրկին մակերես է դուրս բերում «պատերազմների և հակամարտությունների ժառանգությունը», որին Եվրոպայի որոշ շրջաններում վաղուց չէին առնչվել։