Օգոստոսի 16-ի գիշերը Կիևում օդային տագնապ է հայտարարվել՝ բալիստիկ հրթիռների կիրառման սպառնալիքի պատճառով։ Հարձակման հետևանքով երկու մարդ է տուժել, մայրաքաղաքի մի քանի շրջաններում հրդեհներ են բռնկվել և շենքեր վնասվել, հայտնում է РБК-Украина-ն։
Ուկրաինայի արտակարգ իրավիճակների պետական ծառայության տվյալներով, Օբոլոնսկի շրջանում խոցված թիրախների բեկորները խոշոր հրդեհ են առաջացրել շուկաներից մեկի տարածքում։ Հենց այնտեղ էլ արձանագրվել են տուժածները։
Բացի այդ, Օբոլոնսկի շրջանում պայթյունի ալիքը վնասել է շենքերից մեկը, իսկ մեկ այլ վայրում բեկորներն ընկել են ոչ բնակելի տարածք։ Օբյեկտներից մեկի մոտ նաև մի քանի ավտոմեքենա է այրվել։
Եվս մեկ հրդեհ է տեղի ունեցել Գոլոսեևսկի շրջանում՝ ոչ բնակելի կառուցապատման տարածքում։ Փրկարարները տեղայնացրել են հրդեհը։
Գիշերային հարձակումը դարձել է Ուկրաինայի մի քանի շրջանների վրա հասցված զանգվածային հարվածի մի մասը։ ԶԼՄ-ներում նաև հաղորդվում էր Պոլտավայում և Դնեպրում պայթյունների մասին, իսկ Կրիվոյ Ռոգը ենթարկվել է համակցված հարձակման՝ բալիստիկ հրթիռների և անօդաչու թռչող սարքերի կիրառմամբ։
Ուկրաինական իշխանությունները շարունակում են ճշտել հարձակման հետևանքները։