Օգոստոսի 9-ի գիշերը Ռուսաստանը տարբեր տիպի հրթիռներով և 202 հարվածային անօդաչու թռչող սարքերով զանգվածային հարված է հասցրել Ուկրաինային։ Հիմնական թիրախը դարձել է Օդեսայի մարզը, հաղորդում է РБК-Украина-ն՝ հղում անելով Ուկրաինայի ԶՈւ օդային ուժերին։
Ուկրաինացի զինվորականների տվյալներով, Օդեսայի մարզի ուղղությամբ արձակվել են բալիստիկ, հականավային և հակառադիոլոկացիոն հրթիռներ։ Դրանց թվում են «Իսկանդեր-Մ»/Ս-400, «Օնիքս» և Խ-31Պ։ Արձակումներն իրականացվել են Ղրիմի տարածքից և Սև ծովի ակվատորիայից։
Բացի այդ, Ռուսաստանը Ուկրաինայի ուղղությամբ արձակել է 202 հարվածային անօդաչու թռչող սարք, այդ թվում՝ Shahed տիպի, ներառյալ ռեակտիվ, «Գերբերա» և «Պարոդիա» տեսակի նմանակող անօդաչուներ։ Կիրառվել են նաև «Բանդերոլ» թափառող մարտամթերքներ։
08:00-ի դրությամբ, նախնական տվյալներով, ուկրաինական հակաօդային պաշտպանությունը երկրի հյուսիսում, հարավում և արևելքում խոցել կամ ճնշել է 174 անօդաչու թռչող սարք և «Բանդերոլ» տիպի հինգ թափառող մարտամթերք։
Հրթիռների և հարվածային անօդաչուների հարվածներ գրանցվել են 22 վայրում, ևս վեց վայրում հայտնաբերվել է խոցված թիրախների բեկորներ։ Մի քանի հրթիռներ ուկրաինական ՀՕՊ-ի աշխատանքի արդյունքում չեն հասել թիրախներին, դրանց հնարավոր անկման վայրերը ճշտվում են։
Նախորդ գիշեր Ռուսաստանը նաև համակցված հարված էր հասցրել Օդեսային՝ կիրառելով անօդաչուներ և բալիստիկ հրթիռներ։ Քաղաքում գրանցվել են ավերածություններ և տուժածներ։
Օգոստոսի 9-ի առավոտյան ռուսաստանյան ուժերը հրթիռային հարված են հասցրել Խարկովի բազմահարկ բնակելի տներին։ Նախնական տվյալներով, երկու մարդ զոհվել է, կան տուժածներ։ Հաղորդվում էր նաև մարդկանց մասին, որոնք կարող են գտնվել փլատակների տակ։