Իրանի նկատմամբ ամերիկյան ճնշման ռազմավարությունը կարող է անսպասելիորեն թուլացնել ԱՄՆ-ի կարողությունը Մերձավոր Արևելքում իր առանցքային դաշնակցին՝ Իսրայելին, պաշտպանելու հարցում։
Ինչպես գրում է բրիտանական The Telegraph թերթը, այս նախազգուշացմամբ հանդես է եկել ԱՄՆ ԶՈւ Եվրոպական հրամանատարության ղեկավար, գեներալ Ալեքսուս Գրինկևիչը։
Պարբերականի տվյալներով, գեներալը Պենտագոն է ուղարկել ծառայողական գրություն, որում մտահոգություն է հայտնել, որ Իրանի դեմ ԱՄՆ-ի ռազմական ներկայության ուժեղացումը կարող է հանգեցնել Իսրայելին հնարավոր հրթիռային հարվածներից պաշտպանելու համար ռեսուրսների պակասի։
Հիմնական խնդիրը կապված է հակահրթիռային պաշտպանության համակարգի հետ։ Մի քանի տարի շարունակ ամերիկյան հինգ ականակիրներ, որոնք զինված են հզոր ռադարներով և հրթիռ-որսիչներով, գտնվում են Միջերկրական ծովի արևելյան հատվածում և հանդիսանում են Իսրայելին ամերիկյան աջակցության առանցքային տարրերից մեկը։
Սակայն Թեհրանի նկատմամբ ճնշման շրջանակում լրացուցիչ ուժերի տեղափոխման պատճառով անհրաժեշտ նավերից մեկը ուշացել է։ Արդյունքում, ինչպես նշում է The Telegraph-ը՝ հղում անելով ամերիկյան աղբյուրներին, լայնամասշտաբ հակամարտության դեպքում Վաշինգտոնը ստիպված կլիներ ընտրություն կատարել Եվրոպայում սեփական ռազմական օբյեկտների պաշտպանության և Իսրայելին աջակցելու միջև։
Թերթի տվյալներով, Գրինկևիչի մտահոգությունները ներկայացված են եղել մի փաստաթղթում, որը հետագայում հայտնվել է ամերիկյան ԶԼՄ-ների տրամադրության տակ։
ԱՄՆ-ի սահմանափակ ռեսուրսները
Իրավիճակը բարդանում է նաև նրանով, որ ամերիկացի զինվորականները բախվում են սպառազինության պաշարների սահմանափակումների։
Ավելի վաղ ամերիկացի պաշտոնյան The Washington Post-ին հայտնել էր, որ ԱՄՆ-ն բավարար քանակությամբ հրթիռներ չունի Իրանի դեմ երկարատև լայնամասշտաբ գործողություն իրականացնելու համար։ Ըստ նրա, Վաշինգտոնի հնարավոր գործողությունները կարող են սահմանափակվել հակաօդային պաշտպանության միջոցների և հեռահար զինամթերքի պակասով։
«Մենք չունենք բավարար պաշարներ, որպեսզի անվտանգ կերպով շարունակենք գործողությունները», — հայտարարել է թերթի աղբյուրը՝ կարծիք հայտնելով, որ Սպիտակ տունը կարող է թերագնահատել խնդրի մասշտաբը։
ԱՄՆ պաշտպանության նախարար Փիթ Հեգսեթը ավելի վաղ Իրանի հետ հակամարտությունում ամերիկյան մասնակցության արժեքը գնահատել էր մոտ 37,5 միլիարդ դոլար։ The Telegraph-ի տվյալներով, Պենտագոնը Կոնգրեսից խնդրել է ևս 87 միլիարդ դոլարի լրացուցիչ ֆինանսավորում, որի մեծ մասը նախատեսված է Մերձավոր Արևելքում գործողությունների համար։
Ռազմական ճնշում և էսկալացիայից խուսափելու փորձ
ԱՄՆ-ն ավելի վաղ ուժեղացրել էր ճնշումը Իրանի նկատմամբ այն բանից հետո, երբ Թեհրանը փակել էր Հորմուզի նեղուցը՝ նավթի մատակարարման աշխարհի կարևորագույն ուղիներից մեկը։ Ի պատասխան՝ Վաշինգտոնը սկսել էր ծովային շրջափակում, որն ուղղված էր իրանական տնտեսությունը սահմանափակելուն։
Տարածաշրջանում տեղակայվել էին զգալի ամերիկյան ուժեր․ Արաբական ծովում գտնվում էր 11 ռազմական նավից և երկու ավիակիրից բաղկացած խումբ։
Միևնույն ժամանակ ԱՄՆ նախագահ Դոնալդ Թրամփը վերջին օրերին հայտարարել էր, որ հրաժարվել է Իրանի դեմ նոր հարվածներից այն բանից հետո, երբ Թեհրանը, իբր, դիմել էր հարձակումը ժամանակավորապես դադարեցնելու խնդրանքով՝ հնարավոր գործարքի ակնկալիքով։
Ըստ Թրամփի, հնարավոր համաձայնագիրը պետք է ներառի Հորմուզի նեղուցի անհապաղ բացումը և իրանական միջուկային ծրագրի հետ կապված սպառնալիքի վերացումը։