ԱՄՆ փոխնախագահ Ջեյ Դի Վենսը և Իսրայելի վարչապետ Բենիամին Նեթանյահուն երեքշաբթի Վաշինգտոնում անձնական հանդիպում են անցկացրել, որի ընթացքում քննարկել են տարաձայնությունները պատերազմի և Մերձավոր Արևելքում քաղաքականության հարցերի շուրջ։ Ամերիկացի և իսրայելցի պաշտոնյաները զրույցը բնութագրել են որպես «ուղիղ» և «անկեղծ», հայտնում է Axios։
Հանդիպումը տեղի է ունեցել Blair House նստավայրում՝ երկու քաղաքական գործիչների միջև պահպանվող լարվածության ֆոնին։ Պատերազմի սկզբից ի վեր Վենսը համարվում է ԱՄՆ նախագահ Դոնալդ Թրամփի մերձավոր շրջապատում Նեթանյահուի նկատմամբ առավել կասկածամիտ տրամադրված ներկայացուցիչներից մեկը։
Քանի որ հակամարտությունը ձգձգվում էր, փոխնախագահն ուժեղացնում էր իր դերը պատերազմի և Իրանի հետ բանակցությունների վերաբերյալ ամերիկյան քաղաքականության ձևավորման մեջ։ Նա հանդես էր գալիս որպես ամերիկա-իրանական փոխըմբռնման հուշագրի գլխավոր պաշտպաններից մեկը, որին դեմ էր Նեթանյահուն, թեև Իսրայելի վարչապետը հրապարակայնորեն բացահայտ հանդես չեկավ հուշագրի դեմ՝ հույս ունենալով, որ այն կտապալվի։ Ի վերջո պայմանավորվածությունները դադարեցին գործել մի քանի շաբաթ անց։
Վենսի և Նեթանյահուի միջև տարաձայնություններն աստիճանաբար խորանում էին։ Իսրայելի վարչապետը դժգոհ էր փոխնախագահի հրապարակային քննադատությունից. վերջինս իսրայելական առաջնորդին մեղադրում էր Իրանի շուրջ դիվանագիտական նախաձեռնությունները տապալելու փորձերի և Թրամփին անբավարար հավատարմության մեջ։ Իր հերթին, Վենսը կարծում էր, որ Նեթանյահուի կողմնակիցները Իսրայելում և ԱՄՆ-ում նրա հետ կապված լրատվամիջոցների միջոցով փորձում են քաղաքականապես հարվածել իրեն և թուլացնել իր ազդեցությունը։
Ըստ իսրայելցի բարձրաստիճան պաշտոնյայի՝ հանդիպման ընթացքում Նեթանյահուն բարձրացրել է Իսրայելի կառավարության հասցեին Վենսի վերջին հայտարարությունների և Հանրապետական կուսակցության ներսում Իսրայելի նկատմամբ վերաբերմունքի վերաբերյալ մտահոգությունների հարցը։
«Դա անկեղծ և ուղիղ զրույց էր»,- հայտարարել է իսրայելցի ներկայացուցիչը։
Ամերիկացի պաշտոնյան նույնպես հաստատել է, որ զրույցը «ուղիղ» էր, սակայն նշել է, որ հանդիպումն անցել է կառուցողական մթնոլորտում։ Նրա տվյալներով՝ Վենսը և Նեթանյահուն քննարկել են երկու երկրների համար կարևոր Մերձավոր Արևելքի հարցեր և պայմանավորվել շարունակել համագործակցությունը ընդհանուր հետաքրքրությունների ոլորտներում։
Նրանց միջև լարվածությունը դրսևորվել էր դեռևս մարտին՝ հեռախոսազրույցի ընթացքում, երբ Վենսը նշել էր, որ պատերազմի սաստկացման վերաբերյալ Նեթանյահուի որոշ կանխատեսումներ, ներառյալ Իրանի ղեկավարության դեմ զանգվածային ապստամբության հնարավորությունը, չափազանց լավատեսական են եղել։
Ապրիլի 8-ի հրադադարից հետո Վենսը դարձել է Թրամփի վարչակազմում Իրանի նկատմամբ դիվանագիտական մոտեցման ամենաակտիվ կողմնակիցներից մեկը։ Նա բազմիցս հայտարարել է, որ ԱՄՆ-ի գլխավոր նպատակը Իրանի կողմից միջուկային զենքի ձեռքբերումը կանխելն է, սակայն միևնույն ժամանակ խուսափել է երկիրը երկարատև ռազմական արշավի մեջ ներքաշելուց։
Հունիսին Վենսը Իրանի հետ կապված դիվանագիտական նախաձեռնությունները քննադատող Իսրայելի կառավարության ներկայացուցիչներին նախազգուշացրել է, որ նրանք չպետք է հարձակվեն «միակ հզոր դաշնակցի» վրա, որն ունի Իսրայելը։
Ավելի ուշ Ջո Ռոգանի փոդքաստին տված հարցազրույցում նա հայտարարել է, որ որոշ իսրայելցի պաշտոնյաներ ազդեցության արշավ են վարում, որպեսզի ԱՄՆ-ին դրդեն հրաժարվել բանակցություններից և շարունակել պատերազմը։
Վենսի և Նեթանյահուի հանդիպումը երկու առանցքային դաշնակիցների միջև լարվածությունը նվազեցնելու փորձ էր՝ Մերձավոր Արևելքում ԱՄՆ ռազմավարության վերաբերյալ տարաձայնությունների ֆոնին։