Իսրայելի վարչապետ Բինյամին Նեթանյահուն հուլիսի 28-ին ԱՄՆ նախագահ Դոնալդ Թրամփի հետ հանդիպմանը մտադրված է ամերիկյան կողմին ներկայացնել հետախուզական նոր տվյալներ, որոնք, ըստ նրա, վկայում են այն մասին, որ Իրանը վերականգնում է իր ռազմական ներուժը և արագացված տեմպերով ձգտում միջուկային ռումբ ստեղծել։ Այդ մասին հայտնել է N12 հեռուստաալիքը։
Ըստ հեռուստաալիքի տվյալների՝ Նեթանյահուն մտադրված է Թրամփին համոզել, որ տարածաշրջանում տեղի ունեցող վերջին իրադարձությունները ապացուցում են բանակցությունների ընթացքում Իրանի անբարեխղճությունը, ինչպես նաև այն, որ Թեհրանը շարունակում է զարգացնել իր միջուկային ծրագիրը և արդիականացնել հրթիռային ու անօդաչու համակարգերը։ Հեռուստաալիքը նշում է, որ Նեթանյահուի նպատակն է Թրամփին համոզել սպառնալիքի լրջության մեջ՝ միաժամանակ չերևալով որպես մեկը, ով ցանկանում է ԱՄՆ-ին ներքաշել ուղղակի ռազմական հակամարտության մեջ և պատերազմ հրահրել:
Միևնույն ժամանակ, վերջին ամիսներին ԱՄՆ վարչակազմում փոխվել է Նեթանյահուի հայտարարությունների նկատմամբ մարդկանց վերաբերմունքը, պնդում է N12-ը։ Վաշինգտոնի աղբյուրները հեռուստաալիքին հայտնել են, որ հանդիպմանը ամերիկյան կողմը «մեծ թերահավատությամբ է վերաբերվելու Նեթանյահուի ասած ամեն ինչին, և ոչ միայն իրանական հարցում»։ Ըստ հեռուստաալիքի տեղեկությունների՝ Թրամփի մերձավոր շրջապատում կարծիք կա, որ Նեթանյահուն սխալվել է Իրանի հետ պատերազմի վերաբերյալ տրամադրած բոլոր տեղեկություններում։
N12-ի տվյալներով՝ վերջին շաբաթների ընթացքում Թրամփի որոշումների և առհասարակ ամերիկյան վարչակազմի վրա Նեթանյահուի ազդեցությունը «զգալիորեն նվազել է»։ Դրա անուղղակի ապացույցներն են Թուրքիայի հետ F-35 կործանիչների շուրջ գործարքը, Սաուդյան Արաբիայի հետ կնքված միջուկային համաձայնագիրը, որի մասին Իսրայելը քիչ բան գիտեր, և Իրանի հետ փոխհասկացվածության հուշագիրը, որը ստորագրվել է գրեթե առանց Իսրայելի մասնակցության, նշում է հեռուստաալիքը: