2026 թվականի երկրորդ եռամսյակում Հայաստանում կայունացել են գնաճի սպասումները։ Այս մասին են վկայում Կենտրոնական բանկի կողմից տնային տնտեսությունների շրջանում անցկացված հերթական հարցման արդյունքները։
Մասնավորապես, առաջին եռամսյակի համեմատ 47%-ից 41% է դարձել անորոշ սպասումներ ունեցող քաղաքացիների տոկոսը (ովքեր դժվարանում են պատասխանել, թե իրենց կարծիքով ինչպիսի գնաճ կլինի տեսանելի ապագայում): 25 %-ից 28% է դարձել ցածր, իսկ 7%-ից 11%՝ զրոյական գնաճ սպասողների թիվը:
Ընդ որում, նվազել է կտրուկ բացասական և դրական փոփոխություններ սպասող քաղաքացիների թիվը։ Արագ գնաճ սպասողների թիվը 14%-ից նվազել է 13%-ի, իսկ կտրուկ անկում սպասողներինը՝ 8%-ից 7%-ի։
Այսպիսով, քաղաքացիների սպասումները թեքվել են դեպի չափավոր գնաճ (որը ԿԲ-ն ավելի շահավետ է համարում)։
Ինչպես նշվում է ԿԲ մեկնաբանության մեջ, գնաճի սպասումները փոխվում են նույնիսկ փոքր-ինչ արագացված իրական գնաճի դեպքում։ Բացի այդ, ծառայությունների ոլորտում գները, ինչպես նաև մասնավոր հատվածում աշխատավարձերի աճը կայունացել են։
Միևնույն ժամանակ, անորոշ սպասումներ ունեցող մարդկանց էական քանակ (ավելի քան 40%–ը) կանխազգում է գնաճի ռիսկեր` հատկապես հաշվի առնելով պարենային ապրանքների գների համեմատաբար բարձր (միջինից բարձր) աճը։
Նշենք, որ 2026 թվականի փետրվարից Հայաստանում գնաճը գերազանցել է 4%-ը՝ ապրիլին արագանալով մինչև 5,3%, իսկ մայիսին դանդաղելով մինչև 4,2%: Միջինից բարձր է (6,5%) պարենի, մասնավորապես՝ մսի (ավելի քան 20%), ձվի (ավելի քան 30%) և մրգի (գրեթե 13%) գների աճը։