«Գահերի խաղը» սերիալի վրա աշխատանքով հայտնի Սոֆիա Թըրները «աննշան վնասվածք» է ստացել «Lara Croft: Tomb Raider» սերիալի վերագործարկման վրա աշխատելիս, հաղորդում է Page Six-ը։
Amazon MGM Studios-ի սերիալի արտադրությունը ժամանակավորապես դադարեցվել է, քանի դեռ դերասանուհին ապաքինվում է։ «Մենք անհամբեր սպասում ենք նկարահանումները հնարավորինս շուտ վերսկսելուն», – ասել է ստուդիան։
Աղբյուրը նշել է, որ Թըրները, հավանաբար, կվերադառնա նկարահանման հրապարակ երկու շաբաթից, և այդ ընթացքում անձնակազմը կշարունակի նախապատրաստական աշխատանքները և կստանա աշխատավարձ։
Դերասանուհին արդեն ողնաշարի խնդիր ուներ, որը սրվել էր հունվարի սկզբից նկարահանման հրապարակում երկար ժամանակ անցկացնելուց հետո։ «Սոֆիան լիովին նվիրված է դերին, բայց Լարա Քրոֆթին խաղալու ֆիզիկական պահանջները նրան ստիպել են գերծանրաբեռնվել», – նշել է աղբյուրը։ Հունվարի սկզբին Թըրները բացահայտել էր իր «մեջքի շարունակական խնդիրը», որը հայտնաբերվել էր դերի համար մեկ ամիս տևած նախապատրաստական աշխատանքների ընթացքում։ «Մենք անցյալ տարվա փետրվարից ի վեր մարզվել ենք օրական ութ ժամ, շաբաթական հինգ օր, ուստի աշխատանքային ծանրաբեռնվածությունը հսկայական է եղել», – խոստովանել է դերասանուհին։
Դերասանուհին նաև նշել է, որ առանց ֆիզիկական պատրաստվածության նախկին փորձի, նա ստիպված է եղել ամիսներ անցկացնել իր մարմինը դերի համար ձևի բերելու համար։
Թըրները մարմնավորել է Լարա Քրոֆթին Մեծ Բրիտանիայում նկարահանման տարբեր տեսարաններում, այդ թվում՝ անտառային և ձյունառատ տեսարաններում։
Հայտնի հնագետ և արկածախնդիր Լարա Քրոֆթին նախկինում մարմնավորել են Անջելինա Ջոլին և Ալիսիա Վիկանդերը։