Պարսից ծոցում ԱՄՆ հիմնական դաշնակիցները սահմանափակել են Վաշինգտոնի՝ Իրանին հարվածելու հնարավորությունը: Սաուդյան Արաբիան եւ ԱՄԷ-ն բացառել են ԱՄՆ ուժերի կողմից իրենց տարածքի օգտագործման հնարավորությունը իսլամական հանրապետության դեմ ռազմական գործողությունների համար, հաղորդել է The Wall Street Journal-ը: Սաուդյան Արաբիայի թագաժառանգ Մուհամեդ բին Սալմանն այս հայտարարությունն արել է Իրանի նախագահ Մասուդ Փեզեշքիանի հետ զրույցում, ըստ Ռիադի հրապարակած հայտարարության: ԱՄԷ արտաքին գործերի նախարարությունը նմանատիպ դիրքորոշում է հայտնել։
2019թ․՝ Թրամփի առաջին նախագահության օրոք, Իրանը հարձակվել է Սաուդյան Արաբիայի նավթային օբյեկտների վրա, ուստի ե՛ւ թագավորությունը, ե՛ւ էմիրությունները վախենում են Թեհրանի եւ նրա դաշնակիցների հարձակումներից: «Իրանական ռեժիմի թուլացումը եւ սպառնալիքի թուլացումը համապատասխանում են նրանց շահերին, բայց նրանք վախենում են տարածաշրջանային անկարգություններից եւ Իրանի հակահարվածից»,- նշել է «Քարնեգի» հիմնադրամի միջազգային խաղաղության գիտաշխատող Քարեմի Սադջադպուր: Սաուդյան Արաբիայի եւ ԱՄԷ դիրքորոշումը կբարդացնի Թրամփի վարչակազմի ռազմական պլանավորումը, բայց չի կանխի այն, եթե Վաշինգտոնը որոշի գործողություններ ձեռնարկել, ասել են փորձագետները: «Ռազմական տեսանկյունից դա կբարդացնի գործողությունը եւ կբարձրացնի ԱՄՆ-ի կողմից Իրանի դեմ գործողությունների ծախսերը, բայց դա չի կանգնեցնի այն»,- Wall Street Journal-ին ասել է ԱՄՆ ռազմաօդային ուժերի պահեստի գեներալ-լեյտենանտ Դեւիդ Դեպտուլան, որը ղեկավարում էր 1991թ․ Իրաքի դեմ «Փոթորիկ անապատում» գործողությունը, որը ԱՄՆ-ը ղեկավարում էր Սաուդյան Արաբիայում գտնվող հրամանատարական կետից։
Դոնալդ Թրամփը Իրան է ուղարկել ռազմանավերի երկու «նավատորմ»։ Նա սպառնացել է Թեհրանին «նախկինում չտեսնված» հարվածներով՝ դեկտեմբերի վերջին սկսված եւ տասնյակ քաղաքներ ընդգրկած բողոքի ցույցերի դաժան ճնշման պատճառով։ Ավելի ուշ Թրամփը հայտարարել էր, որ «համոզել է իրեն» դեռեւս չհարվածել Իրանին, քանի որ երկրի իշխանությունները չեղարկել են ցուցարարների հարյուրավոր մահապատիժները։
Իրավապաշտպան կազմակերպությունների տվյալներով՝ բողոքի ցույցերի ճնշման ընթացքում կարող էր սպանվել 10-30 հազար մարդ։ Տեղեկատվություն հավաքելը դժվար է, քանի որ իշխանություններն արգելափակել են ինտերնետը, բայց առանձին տեսանյութերն ու հաղորդագրությունները ցույց են տալիս, որ երկիրը դիակների պարկեր եւ դիակնեը տեղափոխելու համար բեռնատարների պակաս ունի։
Թրամփը նաեւ շարունակում է պահանջել, որ Իրանը դադարեցնի իր միջուկային ծրագիրը։
Սպիտակ տան ներկայացուցիչը Wall Street Journal-ին ասել է, որ Թրամփը «շատ ուշադիր հետեւում է Իրանում տիրող իրավիճակին եւ քննարկում է բոլոր տարբերակները, եթե ռեժիմը մահապատժի ենթարկի ցուցարարներին»։