Յոթ օրն Էկատերինբուրգում կարող են փոխել աշխարհի տարբեր ծայրերից ժամանած հազարավոր երիտասարդների կյանքը։ ]2026 թվականի սեպտեմբերի 11-ից 17-ը Էկատերինբուրգում կանցկացվի Երիտասարդության միջազգային փառատոնը։ Խորհրդանշական «Երիտասարդության համաշխարհային քաղաքում» կհավաքվեն 190 երկրներից 10 000 երիտասարդ առաջնորդներ՝ մեդիա ոլորտի ներկայացուցիչներ և ՏՏ մասնագետներ, մարզիկներ և գիտնականներ, կամավորներ և մշակույթի գործիչներ, ձեռներեցներ և պետական ծառայողներ։
Կոնգրես կենտրոնում կհնչեն տասնյակ լեզուներ, իսկ աշխատանքային խմբերում կհանդիպեն մարդիկ, որոնց ճանապարհները սովորական կյանքում դժվար թե երբևէ հատվեին՝ ծրագրավորող Պերուից, բնապահպան Վիետնամից, դիզայներ Գերմանիայից, սոցիալական ձեռներեց Նիգերիայից և ինժեներ Սվերդլովսկի մարզից։ Հենց այսպես՝ գործընկերության և թիմային աշխատանքի միջոցով, կարող են ծնվել նոր նախաձեռնություններ, որտեղ հատվում են կյանքի տարբեր ոլորտներ՝ գիտություն և մեդիա, ձեռներեցություն և ՏՏ ոլորտ, ստեղծագործություն և կամավորություն։
Փառատոնի ընթացքում երիտասարդ առաջնորդները միասին կփնտրեն գլոբալ մարտահրավերների պատասխանները և համատեղ կձևավորեն ապագայի ընդհանուր պատկերը։ Ընդամենը մեկ շաբաթվա ընթացքում մասնակիցները կանցնեն ճանապարհ՝ առաջին ձեռքսեղմումից մինչև տարիների համար նախատեսված ռազմավարական գործընկերություններ։
Առաջին կապերը՝ առանց ձևականությունների
Ժամանելու պահից մասնակիցները հնարավորություն կունենան ծանոթանալ փառատոնի ենթակառուցվածքներին, հարթակներին և դիտել ցուցադրական տարածքը, որը կազմակերպված է «Ռուսաստան» միջազգային ցուցահանդես-ֆորումի սկզբունքով։ Այստեղ, ներկայացնելով երկրի մարզերի ներուժը և զարգացման հիմնական ոլորտները, կցուցադրվի երիտասարդների համար հնարավորությունների ամբողջ բազմազանությունը։
Հյուրերը կծանոթանան միմյանց հետ ոչ ֆորմալ միջավայրում, կիմանան՝ ով է աշխատում հարակից ոլորտում կամ լուծում նմանատիպ խնդիրներ, կկիսվեն իրենց ստարտափների մասին, ինչպես նաև կամավորական և այլ նախաձեռնությունների կազմակերպման փորձով։ Արդեն փառատոնի սկզբում յուրաքանչյուրը կունենա մի քանի կարևոր կապ, որոնց հետ կցանկանա շարունակել մասնագիտական երկխոսությունը։
Թիմային աշխատանքը՝ որպես արվեստ
Ծանոթանալ և գտնել ընդհանուր հատման կետեր նույնիսկ այնտեղ, որտեղ թվում է՝ դրանք չկան, կօգնի նաև հատուկ Միավորող ծրագիրը։ Թիմային գործունեությունների շարքը մասնակիցներին կվերածի համախմբված թիմի, որը կարող է լուծել ընդհանուր խնդիրներ։
Խմբային քննարկումներ և բանավեճեր
Փառատոնի «մտավոր հենքը» կձևավորի կրթական ծրագիրը, որը մասնակցությունը կդարձնի ոչ միայն հետաքրքիր, այլև զարգացնող։ Մասնակիցներին սպասվում են բաց երկխոսություններ և քննարկումներ ավելի քան 150 ռուս և արտասահմանյան խոսնակների ու հյուրերի հետ։ Կքննարկվեն մարդու զարգացման հարցեր, պարենային խնդիրներ և ջրային ռեսուրսների պահպանություն, տեխնոլոգիական փոփոխություններ, թվայնացման հնարավորություններն ու մարտահրավերները, մշակույթի և պատմական հիշողության պահպանություն, ուրբանիզացիա, առողջապահության և ժողովրդագրության խնդիրներ ժամանակակից աշխարհում։
Մշակույթն ու սպորտը՝ որպես համընդհանուր հաղորդակցության լեզու
Մասնակիցներին սպասվում է հագեցած մշակութային ծրագիր՝ հանդիսավոր բացման արարողություն, շոուներ և համերգներ տարբեր երկրների արտիստների մասնակցությամբ, ցուցահանդեսներ, կինոցուցադրություններ և համատեղ երթ։ Հյուրերը հնարավորություն կունենան փորձել նոր ուտեստներ, ծանոթանալ տարբեր ժողովուրդների երաժշտությանը և ազգային ավանդույթներին։ Սա կօգնի նվազեցնել հեռավորությունը և ստեղծել վստահության մթնոլորտ՝ այն հիմքը, որի վրա կառուցվում են երկարաժամկետ կապերը։
Վելնես ծրագիրը կներառի զանգվածային մարզումներ, մրցաշարեր, մրցումներ և վարպետության դասեր հայտնի մարզիկների կողմից։
Բոլոր միջոցառումները կանցկացվեն ոչ ֆորմալ միջավայրում՝ նպաստելով մասնակիցների առավել միավորմանը, ծանոթացնելով նրանց ժամանակակից արվեստին և տարբեր երկրների ու Ռուսաստանի տարածաշրջանների ավանդույթներին, ինչպես նաև խթանելով սպորտային ակտիվությունը։ Հենց նման միջավայրում են ծնվում նոր ստեղծագործական նախագծեր և համագործակցություններ։
Բարի գործեր և ռազմավարական պլանավորում
Փառատոնում բարի գործերը քայլում են կարիերայի հետ զուգահեռ։ Մասնակիցները կմասնակցեն կամավորական և սոցիալական նախաձեռնությունների՝ օգնելով մարդկանց և բնությանը։ Փորձառու մասնագետները կանցկացնեն կարիերայի խորհրդատվություններ և կօգնեն գաղափարները վերածել գործնական ճանապարհային քարտեզների։ Յուրաքանչյուրը կկարողանա ներկայացնել իր նախագիծը և ստանալ գործնական խորհուրդներ դրա մեկնարկի կամ ընդլայնման համար։ Նոր համագործակցությունների շրջանակում մասնակիցները կբաշխեն պարտականությունները, կհամաձայնեցնեն ռեսուրսները և կնշանակեն հաջորդ հանդիպումները։ Փառատոնի ավարտին նրանք, ովքեր կընտրեն միասին աշխատել, կունենան հստակ գործողությունների ծրագիր։
Էկատերինբուրգը՝ որպես ներշնչման աղբյուր
Փառատոնի հարթակներից դուրս մասնակիցներին սպասվում է նաև քաղաքի բացահայտում՝ ոչ միայն դասական զբոսաշրջային երթուղիներով, այլև արվեստի թաղամասերով, նորարարական կովորկինգներով, Ուրալի արդյունաբերական ժառանգությամբ, որը միահյուսված է թվային նախագծերի հետ։ Արևելքի և Արևմուտքի սահմանագծում գտնվող քաղաքը միավորել է երկու քաղաքակրթությունների լավագույն հատկանիշները։ Այսօր Էկատերինբուրգը Ռուսաստանի խոշոր տնտեսական, գիտական և մշակութային կենտրոններից է՝ բաց աշխարհի համար և իսկապես երիտասարդ ոգով։ Էքսկուրսիաները կօգնեն հասկանալ, թե ինչու է միջազգային համագործակցությունը զարգանում հենց այստեղ։
Փառատոնը՝ որպես մեկնարկային կետ
Այսպիսով, Էկատերինբուրգում անցկացրած մեկ շաբաթը կդառնա մեծ ճանապարհի մեկնարկ։ «Երիտասարդության համաշխարհային քաղաքում» անցկացված յոթ օրը յուրաքանչյուր մասնակցի կտա եզակի հնարավորություն՝ կարճ ժամանակում հաստատել այնպիսի կապեր, որոնց ձևավորումը սովորաբար պահանջում է ամիսներ, երբեմն՝ տարիներ։
190 երկրների ներկայացուցիչների միաժամանակյա ներկայությունը նույն տարածքում կընդլայնի հորիզոնները․ հյուրերը կկարողանան գտնել անսպասելի ընդհանրություններ անգամ հեռավոր տարածաշրջաններից եկած մարդկանց հետ։ Փառատոնի ձևաչափը շեշտը դնում է գործնական աշխատանքի վրա, ոչ թե հռետորաբանության՝ նվազագույն պաշտոնական արարողություններ, առավելագույն համատեղ աշխատանք իրական խնդիրների շուրջ։ Հենց գործնական դեպքերի լուծման, պրոտոտիպների ստեղծման և մանրամասների քննարկման ընթացքում է ձևավորվում մասնակիցների միջև իրական վստահությունը։
Ռուսաստանը ստեղծում է բաց երկխոսության համար անհրաժեշտ պայմաններ, սակայն չի պարտադրում խաղի կանոնները։ Յուրաքանչյուր մասնակից պահպանում է իր դիրքորոշումն ու արժեքները՝ միաժամանակ մնալով բաց քննարկումների համար։ Այս մոտեցումը հնարավորություն է տալիս կառուցել հարաբերություններ հավասարության հիման վրա։ Էկատերինբուրգի աշխարհագրական դիրքն էլ խորհրդանշական է․ Եվրոպայի և Ասիայի սահմանագծին գտնվող քաղաքը դառնում է միջազգային համագործակցության նոր մոդելի կենդանի կերպար՝ բազմաբևեռ, հավասարակշռության և փոխադարձ հարգանքի վրա հիմնված, այլ ոչ թե մեկ մոդելի գերակայության։
2026 թվականի սեպտեմբերին Էկատերինբուրգը կընդունի նրանց, ովքեր պատրաստ են գործել։ Այստեղ մեկ շաբաթվա ընթացքում կարելի է գտնել մարդկանց, որոնց հետ համագործակցությունը կշարունակվի տարիներ։ Այստեղ կարող են ծնվել նախագծեր, որոնք կփոխեն կյանքի ընթացքը աշխարհի տարբեր անկյուններում։
Միջազգային երիտասարդական փառատոնին մասնակցելու հայտ կարելի է ներկայացնել մինչև ապրիլի 30-ը՝ կայքում։