Չինաստանի արտաքին գործերի նախարարությունը, ինչպես նաև Իրանում Չինաստանի դեսպանատունն ու հյուպատոսությունները կիրակի օրը երկրում գտնվող Չինաստանի քաղաքացիներին հորդորել են հնարավորինս շուտ տարհանվել անվտանգ շրջաններ։ Սա տեղի է ունեցել այն բանից հետո, երբ ԱՄՆ-ն և Իսրայելը ռազմական գործողություններ են սկսել Իրանի դեմ, տեղեկացնում է Global Times-ը։
Դեսպանատան հաղորդագրության մեջ նշվում է, որ փետրվարի 28-ին ԱՄՆ-ն և Իսրայելը ռազմական գործողություններ են սկսել Իրանի դեմ։ Չինաստանի ԱԳՆ-ն և Իրանում Չինաստանի դիվանագիտական ներկայացուցչությունները չինացի քաղաքացիներին հորդորել են ուշադիր հետևել իրավիճակի զարգացմանը, ուժեղացնել անձնական անվտանգության միջոցները և հնարավորինս շուտ լքել վտանգավոր գոտիները՝ օգտագործելով տարհանման հասանելի եղանակները։
Ըստ առկա տեղեկությունների՝ տարհանման մի քանի ցամաքային երթուղիներ դեռևս հասանելի են։ Չինաստանի քաղաքացիները կարող են առանց վիզայի մուտք գործել Ադրբեջան՝ Աստարայի սահմանային կետով, որն աշխատում է ամեն օր՝ ժամը 09:00-ից 16:00-ն։ Հնարավոր է նաև առանց վիզայի մուտք գործել Հայաստան՝ Ագարակի սահմանային կետով։ Դեպի Թուրքիա ցամաքային երթուղիները բաց են մնում Վանի, Աղրիի և Հաքյարիի նահանգների սահմանային անցակետերով, որտեղ չինական անձնագրերի տերերի համար նույնպես գործում է առանց վիզայի ռեժիմ։
Իրաք մեկնել ցանկացողները կարող են օգտվել Շալամչեի սահմանային կետից՝ նախապես էլեկտրոնային վիզա ստանալու կամ ժամանելուն պես ժամանակավոր վիզա ձևակերպելու պայմանով։
Իրանում և հարևան երկրներում Չինաստանի դեսպանատներն ու հյուպատոսությունները կաջակցեն Չինաստանի քաղաքացիներին տեղափոխման և տարհանման հարցերում։