Հաղթանակի օրվա նախապատրաստական աշխատանքների կապակցությամբ՝ իշխանությունները սկսել են խլացնել Մոսկվայի և Սանկտ Պետերբուրգի տարածքներում գործող բջջային ինտերնետը։ Downdetector-ի տվյալներով՝ այս քաղաքներում համանցանց մուտք գործելու անհնարինության վերաբերյալ բողոքների թիվը սկսել է աճել ժամը 7:00-ից հետո։ Օգտատերերը գրում են, որ չեն բացվում հավելվածներն ու կայքերը, արձանագրվում են ծառայությունների վճարման հետ կապված խնդիրներ։
Ընդ որում, Մոսկվայում չեն գործում նույնիսկ ռեսուրսների «սպիտակ ցուցակները», որոնք անջատումների ժամանակ պետք է հասանելի մնային։ Մայրաքաղաքում նաև SMS հաղորդագրություններ չեն ուղարկվում, ինչի մասին նախօրեին զգուշացվել էր տրանսպորտային ծառայություններին ուղարկված հաղորդագրություններում։
МТС-ից, ի պատասխան մոսկվացիների բողոքների, հայտարարել են, որ կապը բացակայում է «արտաքին ռադիոհաճախականային խոչընդոտների» պատճառով և դա անվանել են «ֆորս մաժոր», որում օպերատորը մեղք չունի։ Т2-ում սահմանափակումները բացատրել են տոների նախաշեմին անվտանգության միջոցառումներով։
Պետերբուրգում բացվում են միայն «սպիտակ ցուցակում» ընդգրկված կայքերն ու հավելվածները։ Միևնույն ժամանակ քաղաքում բջջային ինտերնետը նաև մի քանի ժամով անջատվել էր կեսգիշերի մոտ (ուկրաինական դրոնների հարձակման պատճառով)։ Ընդհանուր առմամբ մեկ օրվա ընթացքում կապի խնդիրների վերաբերյալ ստացվել է 3,2 հազար բողոք Մոսկվայից և 3,8 հազար՝ Պետերբուրգից։
Այս ֆոնին «Սբեր»-ը հաճախորդներին նախազգուշացրել է տոնական օրերին իր ծառայությունների աշխատանքի սահմանափակումների մասին։ Տեղեկագրում ասվում է, որ մայիսի 5-ից 9-ը կարող են դժվարություններ առաջանալ անկանխիկ վճարման, բանկի ծառայություններից օգտվելու, SMS-ներ ստանալու և տերմինալներ օգտագործելու հետ։ Իր հերթին «Յանդեքս»-ը տեղեկացրել է տաքսի պատվիրելու հետ կապված խնդիրների մասին։ «Ծառայությունը կարող է աշխատել ոչ ճիշտ։ Ոչ բոլոր վարորդները կարող են դուրս գալ գիծ և ընդունել պատվերը»,- նշել են ընկերությունում։
Նախօրեին «Բիլայն», ՄՏՍ, «Մեգաֆոն» և T2 կապի օպերատորները նույնպես մոսկվացիներին և պետերբուրգցիներին նախազգուշացումներ են ուղարկել Հաղթանակի օրվան ընդառաջ նախատեսվող շաթդաունների մասին։ The Moscow Times-ի աղբյուրը մայրաքաղաքի տրանսպորտային ծառայություններից մեկում հայտնել է, որ իշխանությունները մայիսի 5-ին, 8-ին և 9-ին մոսկովյան ժամանակով 7:00-ից մինչև 12:00-ն անջատելու են բջջային ինտերնետն ու SMS-ները։ Հասանելի կմնան միայն զանգերը։