Audi ավտոարտադրողը պաշտոնապես ավարտել է իր երկու ամենակոմպակտ մոդելների՝ Audi A1-ի և Audi Q2-ի արտադրությունը։ Երկու մեքենաներն էլ արտադրվում էին ավելի քան տասը տարի և երկար ժամանակ մնում էին ապրանքանիշի ամենամատչելի մոդելները, հայտնում է Autocar-ը:
2010 թվականի դեբյուտից ի վեր ընկերությունը հաճախորդներին է մատակարարել գրեթե 1,39 միլիոն Audi A1 ավտոմեքենա: Audi Q2 քրոսովերը, որը հայտնվել էր 2016 թվականին, վաճառվել է մոտ 887 հազար օրինակով։ Երկու մոդելներն էլ առանձնապես հայտնի էին Գերմանիայում, Մեծ Բրիտանիայում և Իտալիայում:
Այս մեքենաներն ուղղակի հաջորդողներ չեն ունենա։ Audi-ն որոշել է հրաժարվել ներքին այրման շարժիչներով փոքր և համեմատաբար մատչելի մեքենաների սեգմենտից և կենտրոնանալ պրեմիում շուկայի ավելի շահութաբեր հատվածի վրա:
Փաստացի երկու մոդելների տեղը կզբաղեցնի նոր Audi A2 E-tron էլեկտրական մեքենան՝ Volkswagen ID.3 հարթակի վրա կառուցված կոմպակտ էլեկտրամեքենան։ Հենց այն կդառնա բրենդի նոր բազային մոդելը։
Ապագա A2 E-tron-ի արտադրությունը նախատեսվում է կազմակերպել Audi-ի Ինգոլշտադտի գլխավոր գործարանում, որտեղ նախկինում արտադրվում էր Q2-ը:
Միևնույն ժամանակ ընկերությունը հաստատել է նոր ֆլագմանական սպորտային մեքենայի մշակումը: Այն հիմնված կլինի Concept C հայեցակարգի վրա և ոգեշնչված կլինի լեգենդար Audi TT-ի դիզայնով: Սպորտային մեքենայի թողարկումը կսկսվի արդեն հաջորդ տարի Audi Sport ստորաբաժանմանը պատկանող Böllinger Höfe ձեռնարկությունում:
Սա նաև նշանակում է ներկայիս «իմիջային» Audi E-tron GT էլեկտրամեքենայի աստիճանական հեռացում, որը հավաքվում է նույն գործարանում։ Ընկերությունը մտադիր է ազատել արտադրական հզորությունները նոր սպորտային մոդելի համար:
A1-ի և Q2-ի թողարկման դադարեցումից հետո Audi-ի ամենակոմպակտ բենզինային մոդելները մնում են Audi A3-ը և Audi Q3-ը:
Իսպանական Մարտորել քաղաքի գործարանի ազատված հզորություններն այժմ կօգտագործվեն Volkswagen Group կոնցեռնի կոմպակտ էլեկտրական մեքենաների նոր շարքի համար:
Դրանց թվում են՝ Cupra Raval-ը, Skoda Epiq-ը, Volkswagen ID Polo-ն և Volkswagen ID Cross-ը: