Հայաստանում սահմանափակումներ կլինեն պետական գնումներին պետպաշտոնյաների մերձավոր ազգականների մասնակցության համար: «Գնումների մասին» օրենքում համապատասխան փոփոխություններն ԱԺ-ում ընդունվեց երկրորդ և վերջնական ընթերցմամբ:
Համաձայն փոփոխությունների՝ պետական մրցույթներին չեն կարողանա մասնակցել այն ընկերությունները, որոնց հիմնադիրները կամ ղեկավարները բարձրաստիճան պաշտոնատար անձանց՝ նախագահի, խորհրդարանի խոսնակի, վարչապետի և փոխվարչապետերի, ինչպես նաև պետական գնումների ոլորտը համակարգող ղեկավարների, այդ թվում՝ ֆինանսների նախարարի և ոլորտային տեղակալի մերձավոր ազգականներն են (ամուսիններ, ծնողներ, երեխաներ, եղբայրներ, քույրեր):
Բացի այդ, առանձին գերատեսչությունների և համայնքների ղեկավարների ազգականներին արգելվում է մասնակցել համապատասխան կառույցների և գերատեսչությանը ենթակա կազմակերպությունների մրցույթներին:
Ավելի վաղ Հայաստանում պետական գնումների համակարգը բազմիցս քննադատության է ենթարկվել ինչպես նախկին, այնպես էլ ներկայիս ընդդիմության կողմից՝ հովանավորչության վերաբերյալ մեղադրանքների ֆոնին: