Yahoo/YouGov-ի նոր հարցումը ցույց է տալիս, որ Թրամփը դժվարություններ ունի առանցքային հարցերի շուրջ, և նրա հավանության վարկանիշը տնտեսական իրավիճակի ու կյանքի թանկացման պատճառով իջել է մինչև նոր նվազագույն ցուցանիշների։ Այս մասին հայտնում է Newsweek-ը։
Թրամփի գործունեության հավանության ընդհանուր մակարդակը կազմել է 38%։ Այս ցուցանիշը նախորդ հարցման համեմատ չի փոփոխվել, մինչդեռ անհամաձայնության մակարդակը փոքր-ինչ աճել է մինչև 59%՝ ավելանալով մեկ տոկոսային կետով։
Թրամփի տնտեսական քաղաքականության հավանության վարկանիշն ընկել է մինչև մինուս 29։ Սա հարցումների այս շարքի պատմության մեջ Թրամփի տնտեսական քաղաքականության հավանության ամենացածր ցուցանիշն է. նույնիսկ ավելի վատ, քան իր առաջին ժամկետի ընթացքում՝ COVID-19-ի ճգնաժամի թեժ պահին։
Ինչ վերաբերում է կյանքի արժեքի աճի նկատմամբ ԱՄՆ նախագահի գործողություններին, ապա, ըստ Yahoo-ի տվյալների, անհամաձայնություն է հայտնել 67%-ը, իսկ հավանություն՝ ընդամենը 26%-ը, ինչն առ այսօր այս հարցի շուրջ ամենաթույլ ցուցանիշն է։
Բենզինի գները մնում են ևս մեկ լուրջ խոցելի կողմ. այս հարցում Թրամփի քաղաքականության հավանության զուտ ցուցանիշը կազմում է մինուս 39%։