ԱՄՆ նախագահ Դոնալդ Թրամփի ավագ որդիների հովանու ներքո գործող անօդաչու սարքեր արտադրող Powerus ընկերության ներկայացուցիչները բանակցություններ են վարել Աբու Դաբիի պաշտոնյաների հետ՝ ԱՄԷ-ին զենք վաճառելու շուրջ, քանի որ երկիրը փորձում է ամրապնդել իր պաշտպանական համակարգերը Իրանից եկող հարձակումների դեմ։ Այս մասին հաղորդում է Bloomberg գործակալությունը՝ հղում անելով աղբյուրներին։
Ֆլորիդա նահանգի Ուեսթ Փալմ Բիչ քաղաքում տեղակայված Powerus-ը վերջին մեկ ամսում ԱՄԷ-ում առաջատար պաշտպանական համակարգեր առաջարկող ընկերություններից մեկն է, նշել է աղբյուրներից մեկը։ Պաշտպանական ոլորտի արտադրողները իրենց աշխատակիցներին ուղարկում են տարածաշրջան՝ ակտիվորեն շրջելով Պարսից ծոցի երկրներում, քանի որ ԱՄՆ-Իսրայել-Իրան հակամարտության ֆոնին պահանջարկը նրանց արտադրանքի նկատմամբ զգալիորեն աճել է։
Աղբյուրների փոխանցմամբ՝ Powerus-ի հետ բանակցությունները դեռևս չեն հանգեցրել վերջնական համաձայնագրի կնքման։