Իրանի Իսլամական հեղափոխության պահապանների կորպուսի (ԻՀՊԿ) «Ղուդս» ուժերի հրամանատար, բրիգադի գեներալ Էսմայիլ Քաանին կիրակի օրը զգուշացրել է, որ Միացյալ Նահանգները և Իսրայելը պետք է «նոր անակնկալների» սպասեն այն բանից հետո, երբ Իրանի կենտրոնական մասում մի քանի ամերիկյան ինքնաթիռներ են խոցվել:
X սոցիալական ցանցում հրապարակված հաղորդագրության մեջ բրիգադի գեներալ Էսմայիլ Քաանին Միացյալ Նահանգներին հիշեցրել է, որ Իրանի տարածքում նրանց նախորդ «փրկարարական գործողությունները» ձախողմամբ են ավարտվել, ինչպես որ խոցված օդաչուին վերադարձնելու նրանց վերջին փորձը հանգեցրել է ամերիկյան երկու ռազմական ինքնաթիռի և երկու ուղղաթիռի կորստի:
Նա զուգահեռներ է անցկացրել նույն օրն ավելի վաղ իրականացված գործողության և 1980 թվականի «Արծվի ճանկ» (Eagle Claw) գործողության միջև, որը հայտնի է նաև որպես Տաբասի աղետ, որի ընթացքում Իրանում ամերիկյան լրտեսներին ազատելու ԱՄՆ առաքելությունը տապալվել էր անապատում:
Իրանի զինված ուժերը ոչնչացրել են ԱՄՆ երկու C-130 տրանսպորտային ինքնաթիռ և երկու Black Hawk ուղղաթիռ, որոնք ժամանել էին փրկելու այն օդաչուին, որի F-15 կործանիչը ուրբաթ օրը խոցվել էր իրանցի զինվորականների կողմից: «Սպահանից հարավ բարձրացող ծուխը և Միջերկրական ծովում ածխացած իսրայելական նավը հիշեցնում են 1980-ի Տաբասի ձախողման և 2006-ի Սաարի ռազմածովային աղետի մասին»,- գրել է Քաանին: Միջերկրական ծովում «ածխացած իսրայելական նավի» մասին հիշատակելով՝ գեներալը նկատի է ունեցել «Հեզբոլլահ» շարժման հայտարարությունը, որում ասվում էր, որ այն հարվածել է իսրայելական ռազմական նավի Լիբանանի ափից մոտ 68 ծովային մղոն հեռավորության վրա:
Գեներալ Քաանին նաև զգուշացրել է, որ «Էպշտեյնի էլիտան» պետք է նոր «անակնկալների» սպասի ողջ տարածաշրջանում:
«Է՛լ ավելի շատ փակուղային իրավիճակներ և աղետներ անապատում, այս անգամ՝ ողջ տարածաշրջանում»,- նշել է նա: