Դերասանուհի Հեզեր Գրեհեմը խոսել է Հոլիվուդում մտերմության համակարգողների հետ իր աշխատանքի մասին և կիսվել է այս «նոր իրականության» վերաբերյալ խառը զգացմունքներով։
«Կարծում եմ՝ #MeToo շարժումը զարմանալի է եղել, և մտերմության համակարգողները շատ բարի մտադրություններ ունեն։ Բայց երբ նկարահանումների ես գալիս առանց նրանց, և հանկարծ սենյակում հայտնվում է անծանոթ մեկը և պարզապես նայում, թե ինչպես ես ձևացնում, թե սեքսով ես զբաղվում… դա մի փոքր անհարմար է»,- 56-ամյա դերասանուհին խոստովանել է Us Weekly-ին։
Գրեհեմը շեշտել է, որ գնահատում է նրանց աշխատանքը և հասկանում է դերասաններին պաշտպանելու նրանց ցանկությունը, բայց երբեմն ինքն էլ նախընտրում է, որ նկարահանման հրապարակում ավելի քիչ հետաքրքրասեր աչքեր լինեն։
Դերասանուհին հիշել է մի դեպք, երբ համակարգողը սկսել է իրեն հրահանգներ տալ, թե ինչպես պետք է իրեն պահի ինտիմ տեսարանի ժամանակ։ «Նրանք ասում էին՝ «Արա այսպես, և դու կարող ես այսպես անել»»։ Եվ ես մտածեցի՝ «Դու ռեժիսորը չես, լա՞վ։ Ես խորհուրդ չեմ խնդրել, թե ինչպես սեքսով զբաղվել տեսարանում»։ Ես պարզապես ուզում էի ասել՝ «Թող ինձ հանգիստ»։ Ես ուզում եմ, որ ռեժիսորը կարգավորի սա, հակառակ դեպքում ամեն ինչ բարդանում է»։
Գրեհեմը վստահ է, որ իր կինոփորձի շնորհիվ ինքը բավականաչափ ուժեղ է իր սահմանները դնելու համար։ «Գուցե դա օգտակար է երիտասարդ դերասանների համար, բայց ես հիմա բավականին վստահ եմ զգում»,-ավելացրել է նա։
Դերասանուհին այժմ շարունակում է խաղալ և ռեժիսորական աշխատանք կատարել, իսկ նրա նոր ֆիլմը՝ «Նրանք կսպանեն ձեզ», կթողարկվի մարտի 27-ին։