Մինչ ԱՄՆ-ի և Իրանի միջև հակամարտությունը շարունակում է ընդլայնվել, արևմտյան լրատվամիջոցների ուշադրությունն ավելի ու ավելի է սևեռվում ԱՄՆ պաշտպանության նախարար Փիթ Հեգսեթի վարքագծի վրա, գրում է The Guardian-ը։
Ըստ բրիտանական լրատվամիջոցի, Հեգսեթը դարձել է Պենտագոնի ռազմական հռետորաբանության և ռազմավարական դիրքորոշման ձևավորման առանցքային դեմքը, ինչը մտահոգություն է առաջացնում ռազմական փորձագետների, վետերանների և քաղաքացիական հասարակության ներկայացուցիչների շրջանում։
Թերթը նշում է, որ Fox News հեռուստաալիքի նախկին հաղորդավար և բանակի վետերան Հեգսեթը դրսևորում է ագրեսիվ, ցուցադրական «մարտական» ոճ, որը, քննադատների կարծիքով, բավարար չափով չի արտացոլում ռազմավարական խորությունն ու բարոյական պատասխանատվությունը, որոնք անհրաժեշտ են միջազգային բարդ հակամարտությունում ռազմական գործողություններ ղեկավարելու համար։
«Իր հրապարակային ելույթներում Հեգսեթը բազմիցս օգտագործել է կոշտ ձևակերպումներ՝ գործողությունը նկարագրելով որպես համակողմանի ու անզիջում, և ընդգծել է ԱՄՆ զինված ուժերի առավելությունն օդում։ Պենտագոնում կայացած մամուլի ասուլիսների ժամանակ նա խուսափել է գործողության վերջնական նպատակների մասին կոնկրետ պատասխաններից և շեշտել է, որ պատերազմը մղվելու է վճռականորեն և առանց «մարտական գործողությունների վարման հիմար կանոնների», ինչը մտահոգություն է առաջացնում ռազմական ղեկավարության քաղաքականացումը քննադատող փորձագետների շրջանում», – ընդգծում է The Guardian-ը։
Մի քանի պաշտոնական մեկնաբանություններ նույնպես փաստում են, որ Հեգսեթը չի բացառում ամերիկյան զորքեր Իրան ուղարկելու հնարավորությունը, թեև հրապարակայնորեն խոսում է ցամաքային ուժերը երկար ժամանակով չներգրավելու մտադրության մասին։
Քննադատները պնդում են, որ հռետորաբանության նման ոճը, որն ավելի բնորոշ է քաղաքական թոք-շոուներին, քան Պենտագոնի ղեկավարին, կարող է խորացնել պատերազմի՝ որպես գաղափարական արշավի, այլ ոչ թե զուտ ռազմական գործողության ընկալումը։ Ըստ հակառակորդների, սա մեծացնում է դաշնակիցների օտարման և տարածաշրջանում լարվածության էսկալացիայի ռիսկը։